詩姑為咗香港，犧牲自己青春，亦犧牲自己健康，𠵱家功成身退，中央政府都好應該有啲表示。
據聞有啲中央官員，希望詩姐退後可以得到國家級領導地位，所以建議增補詩姑為政協常委，如果成事，最快可以喺明年三、四月人大政協兩會時宣布，情況一如老董今年被迫落台，中央拿拿臨畀個政協副主席位佢一樣。
八方問過一啲政協代表，大家都話就算中央畀詩姑增補為政協常委都唔出奇，事關詩姑一向喺國家事務上勞心勞力，就算佢唔喺特區政府做嘢，都一定會瞓身為國家服務，所以畀個常委佢係絕對正確。
𠵱家個問題反而係，中央會額外喺目前十四個常委外，再增加多一席？抑或用前中聯辦副主任鄒哲開做咗福建省政協副主席後，騰出原有政協常委嘅一職安頓詩姑？呢點到𠵱家都冇人知最後點安排。
姑勿論點樣都好，政協常委地位崇高，詩姑有幸躋身此列，都值得各界恭賀，亦係佢自己嘅榮譽。
傳真︰2623-9278
電郵︰[email protected]