恒指上周全周上升154點，紐約杜指則上升156點。有外圍帶住，禽流感恐懼漸消，港股唔怕大跌。遇上調整，買C輪，咪諗造淡買P輪嗰便。
中銀C輪4644：銀行股有勢，加息對大銀行有利。中銀（2388）全周升0.15元，收報14.75元，屬慢火煎魚格局，PE13-14倍唔貴，長線睇好，揸低溢價C輪有着數，4644係最佳對象。隻輪明年2月尾夠鐘，輪價8.3仙，溢價3.1%，槓桿率17.8倍（有效11.8倍），引伸波幅17.1%。
4644屬穩健之選，如想搏殺，則揀9621。隻輪明年3月尾到期，輪價22.4仙，溢價9.2%，槓桿率65.8倍（有效18倍），引伸波幅15.4%。
賭呢隻輪，要預咗波幅大，萬一正股牛皮或係咁意跌啲，隻輪就會大大走樣。
滙控C輪3409：滙控（005）PE13.5倍以下，亦係唔貴。下周三除息1.09元，估計除息前會搶高些少，留意C輪3409。明年2月中夠鐘，輪價47.5仙，溢價1.2%，槓桿率26.2倍（有效18倍），引伸波幅11.1%。
搏殺格，揀3843，隨時贏輸30%。輪價0.16元，明年1月中到期，溢價2.8%，槓桿率107.3倍（有效34.9倍），引伸波幅10.5%。
章盛