泛民主派同政府講數，搞到煲呔好頭痕，前日重要喺《香港家書》發功，試圖動之以情，希望泛民回頭是岸。煲呔𢱑爆頭之際，第二把手肥龍就依然好鬼輕鬆，表現出一副冇有怕嘅姿態。
佢噚日出席咗多個同政改冇關嘅活動，實行以柔制剛，朝早去公益金百萬行開幕禮，晏晝就去捧工聯會王國興同譚耀宗場，俟晚去添馬艦空地出席職工盟慶祝成立十五周年盆菜宴，夜晚重同煲呔一齊去文化中心，睇柏林愛樂管弦樂團音樂會，只係爭冇去名嘴開咪夜。
柏林愛樂樂團（BerlinerPhilharmoniker）係全世界公認最好嘅樂團，今次嚟亞洲巡迴演奏，重係第一次嚟香港、只奏兩場，不過香港對文化新聞興趣唔大，喺其他地方，柏林愛樂到訪絕對係大新聞，報道一定多過香港啦。
由於兩晚曲目唔同，第一晚有貝多芬嘅第三英雄交響曲等，第二晚就有海頓八十六交響曲等，肥龍𠵱家冇得去外國睇歌劇，只好兩場都買晒飛補返數，今次賣嘅飛破晒康文署紀錄，最貴嘅飛要賣二千五。
前排有文化人批評話，康文署請頂級樂團嚟香港，其實津貼有錢人睇，對窮人冇着數。康文署就反駁話二千蚊以上（即係最貴飛）絕對冇津貼，所以唔係津貼有錢人。
但其實第二貴嘅飛都要賣二千蚊，之後就係千六、千二蚊，都係有錢人先至買得起啫，唔通買千幾蚊飛嘅人就唔係有錢人咩！上海請柏林愛樂，最貴都賣四千蚊啦，呢啲先至唔係津貼有錢人！
睇舞獅時心繫賽馬
八方唔係唔贊成請外國頂級樂團嚟，因為有助提升社會嘅文化水平，津貼一啲都值得，但係唔好畀人覺得厚此薄彼，益多啲錢人。順便提多句，買唔到飛睇嘅，今晚重可以去文化中心外嘅露天廣場免費聽，不過氣氛就差少少喇！
肥龍不但死頂，噚日喺出席譚耀宗同王國興新界西辦事處開幕時，就照舊笑騎騎，同身邊嘅人談笑風生，其間更加煽風點火，主動笑笑口問嫻姐：Donald（煲呔）約咗你未？嫻姐當然話未，肥龍下一句，竟然係話：咁就要砌吓佢喇。好似慌煲呔唔夠煩咁。如果嫻姐真係咁聽話，走去嘈煲呔一鑊，煲呔真係多得肥龍唔少，重可能以為肥龍係無間道㖭。
肥龍咁大犧牲，喺噚日呢個賽馬日都肯到場捧場，應該都令民建聯同工聯會條氣順啲，唔使令佢哋好似係煲呔嘅「棄嬰」咁，算係幫煲呔少少忙咁啦。不過，心繫馬場嘅肥龍，就無時無刻都諗跑馬仔，好似當舞獅哥哥向住肥龍吐出生菜時，肥龍就好鬼開心，事後攬住鄺志堅話，生菜即係生財，好意頭呀，今日一定要落注。採青都聯想到買馬仔，好明顯個心一早飛咗去馬場啦。
傳真︰2623-9278
電郵︰[email protected]
