一班無綫劇集《胭脂水粉》演員昨日在黃大仙出席無綫台慶巡迴展覽，有份角逐台慶夜「最佳女主角」獎的黎姿帶病亮相，非常搏命。而蒙嘉慧匆匆趕來，赫然發現牛仔褲「中門大開」，原來是她忘記扣褲鈕，非常尷尬。
無綫為慶祝三十八周年台慶，特別在各商場舉行台慶巡迴展覽，昨日劇集《胭脂水粉》演員包括黎姿、向海嵐、陳敏之、蒙嘉慧和李國麟等往黃大仙龍翔中心，為《胭》劇服裝展撐場。
想放悠長假期
有份角逐台慶「最佳女主角」獎的黎姿雖然悉心打扮亮相，卻難掩一臉病容，眼部和臉部頗為浮腫，她說：「拍完《火舞黃沙》後到𠵱家只係放過三日假，一路都病緊，未好過。噚日都發燒，今日嚟之前飲咗中藥，食咗退燒丸，搞到我塊面同隻眼都腫，但因為宣傳係我嘅責任，所以一定要撐。」
黎姿續說：「我想喺台慶之後放長假，𠵱家同樂小姐（樂易玲）傾緊，可能都未必批，不過我真係好攰，好想休息調理身子，拍劇拍咗咁耐都想唞吓，最好係我想拍先拍。」
大爆內褲瘀事
而蒙嘉慧匆忙到場，竟發現牛仔褲有一粒鈕未扣好，令她相當尷尬，蒙嘉慧說：「我醜怪呀，好彩冇走光，咁樣當我係fashion啦。」蒙嘉慧又回憶起着牛仔褲的尷尬經歷，她說：「嗰次我着條PaulSmith低腰牛仔褲，又着咗條PaulFrankT-back底褲，一坐低就俾人見到條邊，嗰日就成日俾人寸，問我使唔使咁襯，PaulSmith襯PaulFrank。」
採訪、攝影：楊潔雯
