打政府工啲人，若想放工之後HappyHour，就要愈嚟愈夜，但無阻進士同班友好短敍，在座嘅靚仔AO提起公務員事務局CSB，唔知點解特別咬牙切齒，佢話其實AO一向對CSB冇乜好感，尤其係王永平入主成為問責局長後，每每犧牲公務員利益，就更傷公務員嘅心。
工作欠缺透明度
CSB內有一組專責管理AO人事問題嘅AdminDivision（行政部門）。此組人員更為AO們詬病。因為佢哋掌握所有AO生殺大權，但工作卻甚欠透明度。舉個例子，年輕一輩嘅AO仔都知道要上位快，最好係去一啲靠近權力核心嘅崗位，好似特首辦、政務司司長辦公室（包括旗下行政署）、同埋財政司司長辦公室咁。不過，AO仔並唔係向CSB表示想入呢啲位就可以成事，因為呢啲筍位服侍嘅都係大老細，CSB一般都會搵啲佢哋認為嘅揀手貨。
但係CSB用嘅標準就唔係太客觀，好多時都係喺外國浸過洋水嗰啲AO入呢啲位。似乎CSB亦認定外國返嚟嘅比本地薑辣。
咁又係嘅，當教育統籌局嘅上上下下都將啲仔女送晒出外國留學，就知連政府都對香港嘅教育冇信心啦！AO仔，你升得比人慢只好怪自己喺香港大囉！人家雪糕之子都喺英國讀書啦！
解畫「特別職務」
講開入位，靚仔AO重話CSB裏面有啲叫「特別職務」嘅位，聽起上嚟以為係涉及高度機密工作，查實好搞笑，喺AO圈中嘅「廁所」位。點解咁講呢？原來每當有AO出事（紀律或工作表現出現問題），CSB都會先要求當事人休假靜候發落。不過，CSB嘅AdminDivision出名冇效率，人哋放完假佢哋連紀律聆訊都未安排好，又唔能夠迫人放冇薪假期，惟有畀人返工。點知其他局又唔肯收呢啲好嘢，咪安排佢哋返CSB做「特別職務」囉！
有冇例子呢？嗱，好似早排喺衞福局因為被投訴向女下屬動粗而需要休假嗰位高官，CSB就不動聲色將佢調返嚟做「特別職務」，都成十二、三萬一個月㗎，不過佢都唔領情，近日已經辭咗職，其實辭工亦唔係壞事，起碼保住份退休金呢。
傳真︰2623-9278
電郵︰[email protected]