近排唔知做乜咁啱，商業機構對青少年問題關注多咗，好以噚日，協青大樓開咗間「滙豐學習中心」和「滙豐培訓中心」，就係滙豐捐錢開嘅，滙豐主席鄭海泉梗係要去為呢兩個中心主持揭幕，之後佢重欣賞咗由協青社嘻哈跳舞學校一班學生的助興表演㖭。
查實滙豐總共捐咗470萬畀協青社，其中搞兩個中心只係用咗350萬，剩番嘅又點呢？佢哋嘅主席溫文儀就話，餘額會用喺「青年工作實習培訓計劃」及「青少年工作證書課程」兩個項目上。
鄭海泉風塵僕僕，佢啱啱同王冬勝由上海返港，華華當然要了解吓佢哋贊助嘅高爾夫冠軍錦標賽進行成點，比賽已經圓滿結束，王冬勝同有冇同老虎仔活士（TigerWoods，上圖）過招就唔知，不過呢次老虎仔都失威，敗給英格蘭選手大衞霍威爾。