梁榮忠自從俾人影到背住女友鍾麗淇偷食之後，都好少出嚟公開場合做主持，前幾日無綫嘅節目巡禮佢都係到一到就鬆人。但忠仔噚日就喺將軍澳為無綫節目《幪面超人555》活動擔任主持，唔知佢係咪擔心出去俾fans噓，所以喺後台一路黑住面。
對傳媒好冷淡
噚日嘅活動主角係《幪面超人555》嘅真身半田健人嘅出現，吸引咗二百幾個fans圍觀，雖然忠仔上到台不停四萬咁嘅口去討好圍觀者，但就都冇乜人理佢，忠仔對傳媒好冷淡，活動完咗記者叫佢做訪問，佢話：「你哋鍾意點寫就點寫。」但之前無綫節目《東張西望》搵佢做訪問就無任歡迎，雖然無綫係佢米飯班主，不過未免太大細超。
而喺噚日下晝五點鐘左右，鍾麗淇揸車去咗馬鞍山嘅樟木頭老人度假中心，大概六點幾左右，梁榮忠亦去到老人中心同女友會合，見忠仔手上攞住蛋糕，估計應該係同老人家慶祝生日。
