周星馳憑自導自演嘅《功夫》一片，喺今晚舉行嘅台灣金馬獎頒獎典禮上獲得十項提名，同獲金馬十一項提名嘅港產片《黑社會》鬥個鹿死誰手，雖然決戰在即，不過星爺噚日凌晨重偷閒去中環蘭桂坊蒲吧，可惜撞正查牌贈興，搞到現場七國咁亂。
噚日凌晨一點幾，戴眼鏡同cap帽嘅星爺，留晒鬚根，頭髮有少少亂，佢身穿T恤同長褲，出現於雲咸街，今次星爺就唔踩單車改而行路，一支公匆匆忙忙咁直入位於安慶大廈嘅酒吧。
警方勸喻途人離開
星爺進入酒吧後，相隔約二十分鐘，樓下突然一片混亂，原來有一名男子喺蘭桂坊遇襲受傷，警方要喺現場封路，警車、衝鋒車同救傷車更先後到場，一名頭部受傷嘅男子重瞓喺擔架床上，被抬上救傷車離場。同一時間，有便衣警員到達安慶大廈嘅酒吧查牌，呼籲正喺酒吧外等候入場、近七十名人士馬上離開。而正在蒲吧嘅星爺撞到正查牌，就真係掃興喇。
