梁詠琪（GiGi）日前接受記者訪問時，表示三年內不會跟鄭伊健結婚，她說：「我唔係對伊健冇信心，而係對婚姻冇信心。」GiGi又謂與伊健均十分貪玩，嚮往多姿多采又自由的生活，故暫時沒有結婚打算。
愛情篇：風波後情更堅
梁詠琪和鄭伊健的分手傳聞上月鬧得熱烘烘，碰巧GiGi本月初出碟，故此又流傳一種說法，指兩人的分手傳聞只是宣傳伎倆，鄭伊健對此曾斬釘截鐵地說：「我一定唔會攞呢啲嘢嚟宣傳。」而GiGi日前接受本報訪問時說：「我出唱片，梗係唔想講咁多感情事啦，講都講唱片啦，好彩𠵱家件事過咗去，咪當又過一關囉。」
開始夾口供
伊健曾指GiGi答記者提問，多年來都沒有進步，GiGi對此直認不諱說：「咁又真係冇進步，如果單對單做訪問都好啲，一大班記者我就會好緊張，驚自己講錯嘢，有時有啲嘢又想講又唔想講，講到一嚿嚿窒窒吓。我知自己講得唔好，當初我哋拍拖時俾傳媒圍攻，所以我特別驚講錯嘢，答問題時就諗多咗，一諗，啲記者又覺得我好唔sure咁，更加覺得有嘢，其實我骨子裏係驚記者，有時睇番啲新聞，我講完同寫出嚟嘅唔一樣，我會唔開心，但𠵱家慣咗。」
GiGi表示今次分手風波令她和伊健溝通多了，了解亦加深，GiGi說：「我有因為呢件事同伊健講，以前我哋唔會講呢啲，但明明冇發生嘅事可以寫到好似連續劇咁，先至發現我有同記者溝通呢方面嘅缺陷，我哋亦開始會私下夾吓點同傳媒講嘢。」
唔會唔去街
GiGi續說：「好似之前有傳媒寫我哋去食血鴨咁，我哋係有去嗰間餐廳，但冇食血鴨，上車之後發現有記者，我即刻好緊張，伊健經歷多過我，佢好輕鬆，重叫我『唔使驚，畀啲笑容』，呢方面真係要向佢學習，同我補習吓點答記者嘢，亦因為咁我哋了解多咗。」
伊健和GiGi均住在匡湖居，GiGi表示閒來兩人會踩單車或出海游泳，她說：「我唔會因為驚記者影相而壓抑唔同佢去街，有一排啲狗仔隊成日喺我屋企出面等，但我又真係冇諗住出街，記者都要交功課，我明白佢哋辛苦，但自己又唔識handle，可能我對於答問題太認真，反而衰咗，𠵱家學習緊。」不過伊健日前對記者說，自己有時會出海，但女友怕曬黑，故不會同行，看來兩人的口供仍有出入。
未想過生仔
至於結婚，GiGi表示和伊健已達共識不會於三年內拉埋天窗，GiGi說：「我哋唔想組織家庭住，因為大家對工作都有期望、有抱負，大家又未玩夠，加上我喺單親家庭長大，父母離咗婚，我唔係對伊健冇信心，而係對婚姻冇信心，其實結婚只係形式，兩個人一齊溝通到先係最重要，我唔敢講成世唔結婚，neversaynever，但唔會係呢幾年，𠵱家咁嘅狀態係最開心嘅。」
至於生BB，GiGi更想都沒想過，她說：「結婚我有同伊健傾過，生仔就講都冇講過，其實我都鍾意小朋友，見到小朋友就忍唔住想錫，但係呢排一定唔會。」
