收咗口一排嘅「亞瑟王」李國章，又再開口鬧人，呢次中招嘅係佢昔日戰友之一嘅理大校長潘宗光。人要變臉，就係咁容易。
潘校長前幾日喺個同學生對話嘅活動上，爆料話教統局喺一、兩年前同理大達成「默契」，話會將一幅紅磡灣地撥畀理大起新學生宿舍，點知近排見地價升，政府想攞返塊地嚟賣，激到佢好扯火。潘校長內幕料一出，先喺前日俾政府出新聞稿否認，噚日再俾李國章插多刀。
又鬧教院高層反口
李國章噚日出席一項京港學生活動後話，知道潘宗光好想有塊地起學生宿舍，但政府從冇應承理大會畀嗰塊地佢哋，院校要申請土地係有正常程序，重狠批潘宗光話：「香港係有規矩、程序，唔係即刻要就攞到，『𦧲』唔係一個理性嘅做法。」
香港教育學院高層亦俾佢鬧埋一份，因為教院已擁有自我評審課程權力，即同其他七間大學一樣有大學之權，不過就冇大學之名，所以校方想正名，但政府唔批。李國章話，當日批權畀教院，大學教資會已同佢哋表明同正名冇掛鈎，當日教院高層都話收到，𠵱家教院反口令佢好意外。
當被問及點解唔可以好似內地咁畀教院做師範大學，李國章即刻搬出一國兩制話，「係咪想跟番大陸呢？」佢強調一切要跟番手續，如果條件符合一定冇問題，「但喺度嘈、喺處拗，係完全冇意思㗎。」
難為大學校長同培訓教師嘅院校，竟然俾人鬧賴皮，可能李國章以前做中大校長時唔使同政府「𦧲」啩。潘校長潛心禮佛，而教院又處弱勢，呢次睇嚟冇人會還擊囉。
傳真︰2623-9278
電郵︰[email protected]