呢十幾日，好似未見過藍天白雲，唔使睇天文台之空氣污染指數，都知道空氣唔慌好得去邊。天文台經常話「今日有煙霞」，煙霞多之日，空氣污染指數一定高。有啲聰明人話，香港煙霞相等於英文之smog，左丁山總係覺得唔多夾。每見到「煙霞」呢個詞，左丁山就想起鄉間村屋廚房黃昏燒飯時冒出之白煙，有一股寧靜感覺。再念埋「滕王閣序」名句：落霞與孤鶩齊飛，秋水共長天一色。霞者，據《辭海》解釋，日光照於卷雲所生之紅色光采也！現今天文台所謂之「煙霞」，何來日光照雲現紅光？整個意象，與smog唔同噃。
呢日見報紙講廣州空氣太差，沙士專家鍾南山勸廣州市民唔好在清晨晨運，因為「灰霾天」日子，空氣污染十分差劣，慢性肺病等呼吸系統病患者一旦吸入污染空氣，隨時出現呼吸困難、誘使病發。早晨氣壓較低，污染物易聚積，故此不宜在此時候做戶外運動。
廣州唔用「煙霞」，用「灰霾」，果然用字貼切。查《辭海》，霾，音埋，大風揚塵土，從上下也；霾，晦也，如物塵晦之色也。雖然喺空氣污染之日，未必有大風揚塵，而且多數係一滴風都冇，但「灰霾」嘅意思，比「煙霞」更為貼切。香港與內地成日講經濟融合，交通運輸融合，事實上，最快融合嘅，就係空氣污染，廣州珠三角空氣差，香港唔會好得去邊。香港天文台用字不如與珠三角融合啦，以後唔用「煙霞」，改用「灰霾」，未知天文台諸公以為如何？
珠三角污染，除咗工廠多，環保意識唔夠之外，中小企業聯合會主席鍾紹榮講內地好多貨車超重運載，用高硫柴油，經常在公路上噴黑煙，呢啲黑煙非同小可，黑到連後面嘅車差唔多幾呎之內睇唔到前面，十分危險。珠三角富起來了，但又未至富有到全部用低硫柴油以及不超載，故此灰霾始終不散。