鍾意睇驚慄片嘅觀眾，有時未必會刻意研究劇情，往往因為氣氛緊張、冇唞氣位，120分鐘一閃而過，再深呼吸一下，跟住就拍手離場！筆者亦係驚慄片Fans，睇完《活死人地帶》之後，有一番新體會：乜喪屍都有思想嘅咩？冇錯！呢齣電影嘅導演佐治A.雷美奧，曾擔任過《生人勿近》及《活死人之夜》等驚慄大作，還以為喪屍題材已玩到山窮水盡之際，勢估唔到，喺《活死人地帶》入面嘅喪屍，唔單止弒血成狂，原來重識得用腦殺人，認真絕！
記者：陳國輝
Profile
區碼：3區
字幕：中/英
售價：$135（DVD）
$45（VCD）
$148（UMD）
年代（27873612）
喺活人與喪屍共存嘅世界裏面，奸狡商家卡夫曼操控住整個城市。貧民窟居民只能於被監視下偷生度日；同時，喺城外受電網隔絕嘅喪屍群，亦成為奸商搵錢賭博嘅工具！喺一次執行任務時，僱傭兵將軍拉利以及副手阿佬發現一個驚天秘密，原來喪屍已開始發展出思想，而且識得模仿人類嘅動作！另一方面，阿佬心存不軌，密謀取代卡夫曼嘅地位，以求盡享奢華。拉利於是與拍檔阻止阿佬嘅行動，但呢個時候，城牆之外，喪屍已蠢蠢欲動！
喪屍血腥有思想
如果觀眾抱着玩電視遊戲《BIOHAZARD》嘅心態嚟睇呢套電影，咁就冇錯喇！喺《活》片裏面，電影與電視遊戲一樣，到處都有驚嚇情節！起初，喪屍仍然受到人類全面控制，但冇幾耐，喪屍已識得模仿人類嘅活動，例如入油站加油、用電鑽爆破大廈玻璃等。至於最驚嚇之處，莫過於喪屍竟然懂得用機關槍掃射人類，然後再將佢監生咬死！當然，喪屍電影始終離唔開大玩血腥，《活》片喺呢方面絕對交足功課！基本動作，例如咬甩耳仔、生食手指當然唔少得，不過最核突嘅畫面，就係成群喪屍將一名青年嘅內臟扯出嚟再慢慢食，該片段嘅惡心程度簡直爆晒燈！
全城市民困獸鬥
活人與喪屍本來就生存喺一河之隔嘅世界，但狡猾商家為求獲取暴利，屢次組織僱傭兵橫越河流，一方面要收集食糧及奢侈物資；另一方面，就係要「生擒」喪屍作為搏擊賭注！更甚者，人類更視喪屍為玩物，隨手就將佢哋殺射或虐待！不過，當喪屍發展出思想之際，情況就開始扭轉，佢哋已學懂涉水橫渡河流，任何欄柵圍牆都不可阻擋喪屍的入侵，世界已步入「弱肉強食」的蠻荒恐怖中！
Making睇喪屍化妝
《活》片最引人入勝之處就係特技同化妝，喺DVDBonus裏面，總共收錄咗幕後花絮、喪屍化妝變身過程以及喪屍試鏡大會等多條片段；另外，介紹製作班底、訪問導演佐治A.雷美奧，以及由演員親談拍攝感受等內容亦一一盡錄。不過，DVD包裝稍為簡單，如果你希望有額外禮品附送嘅話，可能會有啲失望！
