GiGi給人事業心很強、野心很大的印象，對此她說：「我啲同事又唔係咁睇我，可能我做歌手曝光率多啲，但邊個歌手唔係成日曝光？我乜都鍾意做，亦享受做嘢，工作上冇話特別去部署，但有機會就會珍惜，趁後生做多啲，去多啲旅行，有得出trip我第一個報名，我試過自己打電話去慈善機構，問佢哋有冇得外出探訪。」
「冰美人唔易做」
GiGi在新碟《look》中，歌曲《名模》、《比堅尼》、《小裁縫》和《雲裳風暴》等均以時裝為主題，她透露近年看了很多時裝騷，覺得音樂和時裝是不可分割。身形高䠷的GiGi原來想過當模特兒，但自從早前往米蘭行天橋拍MV後，發覺自己不適合這行業，她說：「行天橋其實好難，唔可以笑，要畀人冷冰冰嘅感覺，做冰美人唔容易。」
GiGi近年在作曲方面有一定成績，但她強調心血來潮時才會創作，在新碟中亦只有《在天堂遇見的人》是她的作品，GiGi說：「作曲對我嚟講冇壓力，因為有壓力就未必會作得好。」談到近年少拍電影，曾拍過《心動》和《向左走．向右走》等佳作的GiGi說：「電影我會選擇嚟做，年尾應該會有一套戲開，要衡量囉，我希望係貴精不貴多，好似唱片咁，今年只出過一張廣東碟，重係年尾先出，因為我想慢慢做，做到滿意為止，而唔係為咗攞獎而出唱片。」
家庭篇：為媽咪要爭氣
問GiGi如何排列家庭、事業和愛情，她說：「我覺得家庭同愛情可以係一齊嘅，因為都係你錫嘅、關心嘅人，唔係以自己做單位；而事業就屬於個人，我覺得家庭同事業需要保護多啲，而且對於女人嚟講，事業始終冇咁重要，當然我係藝人，𠵱家係黃金時期應該珍惜機會，所以都重要嘅。」
GiGi現時和母親、弟弟同住，由於她自幼和母親相依為命，彼此感情也特別好，她說：「媽咪離婚之後，有一段時間細佬獨自去咗外國讀書，所以我哋兩個一齊住咗一段時間，大家感情好好，老套啲講句係相依為命，因為經濟問題，媽咪要出番嚟做嘢，我嗰陣就同自己講，要做好自己嘅嘢、讀好啲書，咁先至可以減輕媽咪嘅負擔，自己亦要健健康康，唔好令佢擔心，所以自細培養咗獨立性格。」
母親曾勸退出
GiGi和伊健拍拖初期，由於壓力太大，母親曾叫她不要做娛樂圈，GiGi說：「媽咪𠵱家唔睇報道，但當時覺得做乜咁話我個女，佢叫我唔好做，佢又唔係要過啲乜嘢奢華嘅生活，我嗰陣細個，遇到咁嘅事當然會喊，亦覺得好攰，慢慢知道呢個只係遊戲規則，只係自己唔識得玩，𠵱家有事未必乜都同媽咪講，因為唔想佢擔心，亦識得開始喺傳媒嘅報道同自己嘅生活之間攞番個平衡點。唉，有時好矛盾，見到一個封面寫完又一個，我試過問記者點解，佢哋話因為賣得，聽到咁嘅答案，都唔知應該開心定擔心。」
採訪：張止寒 攝影：陳志嵐
場地提供：LaBrasserie（TheMarcoPoloGateway）