同細路豪講謎語，諗落都係要搵一本淺白啲嘅燈謎書至得，昨日講嗰本《最新燈謎集成》，唔多適合小學生睇。
不過細路豪睇唔明啫，好在夠膽發問。香港啲學生有時唔係唔敢發問，而係老師唔鼓勵，一位老友嘅大仔Ｈ沉默寡言，每次成班人坐埋，佢說話唔會超過兩分鐘，聽一位校長朋友講，Ｈ仔間中學素來唔畀學生多嘴，只係要學生苦讀！左丁山讀中文小學之時，班主任喺手冊上寫下評語：「天資聰穎，惜欠勤奮，欠安靜。」老竇睇咗，就鬧左丁山喺學校唔好咁多嘴。升上英文中學嘞，班主任喺手冊上只寫一個字：talkative，左丁山於是又俾老竇鬧死性不改。教育如此，香港人唔多識在公共場合發言，你聽吓啲議員辯論就知道啦。
細路豪特別唔同，生出把口唔收，口沒遮攔，乜都夠膽講，佢父母為之頭痛，○四年七月一日佢阿姨拖佢去大遊行之時，佢行在一班港大學生之前，同大學生一齊嗌口號，面有得意之色，都唔知幾爽神。
細路豪睇住本謎語書問左丁山：「謎面話：四川老百姓，猜歐洲大城市名，謎底係巴黎，唔明喎，究竟點解？」左丁山諗咗一陣，解畀佢聽：「可能係咁樣，四川古稱巴蜀，而老百姓就係普羅市民，文雅啲就叫做黎民，四川老百姓就係巴蜀黎民，故此謎底就係巴黎，明白未？」細路豪似明非明，又問：「普通人點解叫做黎民？」左丁山幾乎為之語塞，小五學生有此一問，唔答唔得，好彩以前查過辭海，重記得：「黎，係姓氏，名人有黎明、黎智英；黎人，係少數民族，居於海南島。黎字嘅解釋就係眾、民眾、人多咁解；黎，亦係黑色咁解。古時人民多數耕田，曬到黑晒，人多且面黑，就係黎民，故此老百姓就係黎民。」細路豪猛話：「明嘞，明嘞。」都唔知真定假，不過因為玩猜謎語而學到一啲地理常識，再學埋詞語，對呢位小五生嘅中文，一定有幫助，希望激發到佢興趣之後，唔好係七日鮮啦。