金朝陽（878）由8月以嚟一直調整，呢個moment，兩折有售，一個字：「抵！」
老老實實，金朝陽最大嚿資產係金朝陽中心，呢幢物業，正正喺銅鑼灣時代廣場對面，絕對重秤，帳面值達到32億銀。集團月頭伸手配股，NAV由6月10.32元攤薄到伸手後9.6元，但折讓重大嗱嗱講緊80.5%，現兜兜兩折有售。隻股折讓大到無譜，部份原因可能係債重（10.49億銀長貸）。
但要咁睇，金朝陽另外揸住待發展物業，上年底帳面值3000萬銀，如無意外，應該屬於元朗同西貢總樓面20萬方呎地皮。計計數，地皮樓面成本價不過百五蚊，成本太低（可能係往年撥備關係），獲利條件豐厚，以每方呎獲利1000蚊計，利錢就兩億銀，而金朝陽最新05年中期報告話，項目已經開始施工，照咁睇大有機會？短期內，紓緩集團重債問題。又金朝陽現價1.87元，呢期伸手價1.95元，重係潛緊水。
麗國短期可炒業績
麗國（191）上星期四有達五球股數成交，係8月以嚟少見，又講兩點：第一，麗國5月伸手8供1之後，NAV1.46元，現價（0.395元）折讓貼近73%，有炒賣資產折讓因素。第二，呢勻麗國供股，認購不足，包銷商要履行包銷配售，而麗國供股以嚟，暫時重未上番供價股0.5元之上。麗國將喺嚟緊星期五公布05年度（7月止）業績，集團05年度中期純利24億銀，已經有中期業績墊底，睇嚟短期內，麗國業績係市場一個絕佳炒賣理由。股價彈番上供股價，已經有四分一番。
錢雋