喺爭取民主嘅路途上，中國人都算係毅行者，由黃帝開始，條路行咗幾千年，除咗台灣之外，黃土地上始終冇民主、冇普選，不過中國人從來冇放棄過。就好似樂施會一年一度舉辦嘅毅行者一百公里步行籌款咁，每年都有幾千人參加，噚日重破紀錄有四千幾人，有隊伍索性用「07/08」做隊名，因為佢哋明白，路係人行出嚟嘅，只要堅持落去，就會見到終點。
而主持毅行者起步禮嘅，正是主持政改方案嘅政務司司長許仕仁，估唔到，肥龍好多fans，有人大嗌「司長！司長！」又有人搵佢合照。八方就喺人叢中大叫，問肥龍重要行幾耐先至有普選，佢同陳智思就睥一睥八方，冇回應。八方想同肥龍講，毅行者咁難行都有個時間表，限時四十八個鐘頭內完成，普選冇時間表，又點對得住六百萬香港人？
傳真︰2623-9278
電郵︰[email protected]