短線遊:深圳新水療會所¥68Hea足一日

短線遊:深圳新水療會所¥68Hea足一日

香港寸金尺土,要有大型的娛樂設施都幾難,但係鄰近的深圳,勝在地方夠多,所以近年開了不少以港客為目標的大型「水療會所」,不只地方大、設備齊全,做埋按摩兼享受免費設施,Hea足一日所費無幾。多功能大型「水療會所」已成為深圳吸引港客的一大賣點,最近又有兩家大型水療會所加入,到深圳不愁無選擇。

記者:張逸濠
攝影:杰佬 
Model:Johnny、Carol、Ken(Salvador)

消費有預算

北上按摩已成為港人好似卡拉OK一樣的公餘娛樂,跟現在深圳的新大型「水療會所」設備愈來愈齊全、集吃喝玩樂於一身不無關係,「捐」入去要消磨大半日絕不會悶,最重要埋單都係百零蚊,好多人都花得起。
美亞裝修豪華,設備都唔錯,男女浸池都有SPA任用,加埋其他免費服務,做一個中式按摩90分鐘收費都係¥68,小費隨意,¥100唔使就落到樓,相當經濟。裏面更加有男女賓美容,慳埋啲錢,做埋香薰浴美白都重得。

■加多¥68可以浸一個香薰浴,靚女去美白最啱。

■男女浸池都有唔同的SPA設備,浸一浸揼骨時候效果亦特別好。

■走廊通道的設計都好豪,令人感覺似上等人。

貴賓房抵玩

如果人多,開一間貴賓房,一班人打麻雀、上網又得,一間租金首小時都係¥138,以後每小時¥48,按摩費另計,多人玩,除開都有着數。

■貴賓房一班人來玩,上網、打麻雀、睇電視,各取所需。

■另一邊可以揼骨,有日式、泰式、中泰混合式的房間。

點心食上癮

美亞重有另一樣特色,就係餐廳的點心,原來係由一位得過法國美食藍帶獎的師傅主理,好多客原來按摩¥68,但係食點心就一碟接一碟,最後「妹仔大過主人婆」,食點心貴過按摩,而且食上癮,專誠上去飲茶配角按摩的,大有人在。

■甜而不膩南瓜餅 8、幼滑鮮蝦腸粉 15,點心全部即叫即做。

免費設施唔會悶

美亞國際健康水會
地址:深圳市羅湖區鳳凰路193號海瓏華苑1、3、4層
電話:(86)755-25691223
時間:24小時
收費:中式90分鐘¥68、泰式90分鐘¥108、日式90分鐘¥158
交通:羅湖火車站乘的士約¥20,亦可在羅湖巴士總站乘424中巴¥2.5,鳳凰路下車;皇崗乘的士約¥30。

■好多大型水會式桑拿,都有免費上網設備,呢度都唔例外,而且係卡位式,感覺幾Cyber。

■每晚7:30之後,會有樂師表演古箏,琴音清脆聽出耳油,Relax到痹。

■坐住電動調校的頭等機艙式梳化,再加一人一部LCD電視,未揼之前已經好放鬆。

三五知己好去處

人多「柴娃娃」去玩特別開心,但按摩的時候,好多因為地方關係,按摩房頂多都係容納3人,如果有4人房已經唔錯,一班朋友想一邊「吹水」,一邊按摩都幾難。一係就另外畀錢開一間貴賓房,但又要額外花一筆,似乎唔夠精打細算。但係新張的「在水一方」,就特設一些5人大房,只要夠人頭就可以一齊免費使用,人就唔需要「天各一方」,一邊揼一邊傾偈,揼得特別暢快。
如果經常腰痠背痛,可以試試呢度的中醫推拿,收費相宜,而且刮痧、拔火罐、針灸等都有,更可做埋對疲勞及勞損功效特別好的「醫療燈」,都係¥118雙鐘。

■闊落頭等艙椅,加一人一LCD,亦是大場必備服務,「攤」住做腳底,爽死。

■深圳桑拿比較少有貴賓房以外的免費5人大房,呢度只要5個人一齊來,就可以免費安排大房,一班人來最啱。

■中醫推拿收費相宜,雙鐘¥118,除穴位推拿外,可以做刮痧、拔火罐等,較特別的有醫療燈,對疲勞及勞損功效特別好。

做乜都一齊

話明大型水療會,地方夠大,可一班人一齊行動。沖涼之前可以在大堂前的電腦一齊揀吓技師,跟住一齊浸浴,一齊喺休息室Hea,一齊睇波,然後一齊揼骨,成班好朋友一齊玩,唔一定要去唱K。

■池區SPA夠大,成班朋友一齊浸,夠晒熱鬧。

■成班人喺電影院睇戲睇波都特別有氣氛,最正係好多大戲院都無咁正的梳花俾你「Hea」。

■大堂門口已有電腦選空閒技師,趕時間同朋友揀定,沖完涼馬上按摩,慳好多時間。

食足三餐過夜至啱

呢度餐飲菜式豐富,如果趕時間,連飯都可以唔使在外面吃,一站式搞掂。晚上6:30至8:00有自助餐供應,雖然要加收¥10,但一個星期七日菜式都唔同,而且有老火湯、又有海鮮,收費絕對合理。如果有時間,過埋夜更有消夜,第二朝又有早餐送,好過住酒店。

■收費自然食物質素都好一點,連蝦、蟹都有得食。

在水一方休閒會所
地址:深圳市羅湖區鳳凰路193號海瓏華苑1、3、4層
電話:(86)755-83852458
時間:24小時
收費:中式雙鐘加60分鐘腳底按摩¥100、泰式雙鐘¥108、日式雙鐘¥138,中醫推拿雙鐘¥118(平日每鐘以60分鐘計算,六、日及假期每鐘以45分鐘。)
交通:羅湖火車站乘的士約¥30,皇崗乘的士¥12.5。皇崗走路約7分鐘。
免費專車:可在羅湖及皇崗接送,
電話:(86)13008870585。