曾俊華執支好籌，要負責世貿部長級第六次會議，不過，得到舊上司肥彭稱許為非常優秀而且有能力嘅公務員，辛苦都值。鬍鬚仔噚日喺外國記者會引述樂施會最近一次調查，話有九成二本港市民唔知世貿部長級會議係乜，不過佢對有百分之八嘅市民了解情況已感安慰，重話如果喺美國或會低於呢個水平喎。
今次喺香港舉行嘅會議點解咁重要？因為對上一次喺墨西哥坎昆舉行嘅會議失敗告終，如果今次再冇進展，佢話世貿組織嘅公信力將蕩然無存。
今次會議嘅重中之重係促使歐美發達國家減少對當地農業補貼，咁樣窮國先至可以有生存空間。佢舉例話，「喺歐盟一隻牛每日會獲得政府兩個二美元補貼，全球十二億貧困人口嘅生活水平都冇咁高！」美國政府每年嘅貿易補貼開支達二百億美元，歐盟更達七百億歐羅，咁你話啲弱國點同你爭？
傳真︰2623-9278
電郵︰[email protected]