立法會大樓宴會廳噚日高朋滿座，皆因范太哋做東，請特首以及一眾高官、行會成員同立法會議員午宴，聯絡感情。肥龍、唐唐、黃仁龍以及多個局長都有出席。
范太喺致辭時話，歡迎煲呔首次以特首身份出席，又話歡迎啲新行會成員嚟，當中多位（好似夏佳理、張炳良、張建東同梁智鴻）係回娘家，大家意見可能不同，但希望能夠好好合作啦。
煲呔抽籤坐田少隔籬
客套一輪後，范太話身為主席，只可以講啲同政治無關嘅嘢，跟住就借煲呔諷長毛。范太話呢排行街見多咗人打煲呔，但係喺立法會嘅同事就冇人會打煲呔，甚至乎越嚟越少人會打呔，好多人一聽就知佢係想藉此機會笑長毛，請佢平日要莊重啲，但係偏偏長毛噚日就冇到，真係嘥鬼氣。
噚日筵開五席，所有座位全部由抽籤決定，但田少就咁啱坐喺煲呔嘅右邊，煲呔坐低後即時顯得冇晒癮，對於呢位政治冤家真係連眼尾都唔望一吓，未上菜已經喺度猛夾伴菜食，連手都用埋。
而坐喺另一張枱嘅陳鑑林就暗寸李永達。話說李永達向周一嶽呻話自己腳痛，又唔敢跑步、踩單車，重問局長有咩運動最啱佢，周醫生梗係好正經咁叫佢游水啦。點知陳鑑林就搭嘴叫局長不如建議達仔「原地踏步」，話咁樣冇咁傷喎。
黃仁龍首次去呢類聚會，佢同議員話，做咗司長後生活習慣同以前好唔同，冇咁早可以返屋企食晚飯，所以返到屋企見到個女都好似大個咗咁。
噚日由冷盤到果盤共有八道菜，黃容根重為今次午宴加餸，包括由法國引入本地飼養、皮薄又冇乜脂肪嘅法國雞，重有鶴藪種嘅白菜仔，同埋有機農場種嘅密瓜，煲呔梗係猛咁話好食啦。
傳真︰2623-9278
電郵︰[email protected]