美股掂，港股亦掂，恒指再升107點。後市點睇，都係反覆向好，除非有意外突發事件或禽流感惡化。
駿威C輪9361：是日最猛嘅窩輪係駿威C輪9361，收2.6仙，升136%，有5球半易手，銀碼十幾萬。炒呢隻輪，係玩死亡遊戲，不過輸晒都只係三兩個仙。
9361明年3月初夠鐘，溢價32.2%，槓桿率96.2倍（有效11.1倍），引伸波幅35.5%。行使價3.28元，正股（203）𠵱家只係2.50元，隻輪雖然壽命唔短，但要望正股上到行使價，可能要望到條頸長過長頸鹿。如果睇好駿威，勉強可以諗嘅只有9834，輪價0.34元，明年7月尾夠鐘，溢價8.8%，槓桿率7.4倍（有效4.7倍），引伸波幅33.2%。
恒指C輪4748：是日最威嘅恒指C輪係4748，收20.4仙，升幅31%。呢隻係末日輪，本月29日到期，23日最後買賣，剩番8日交易，溢價0.5%，槓桿率35.8倍（有效25.2倍），引伸波幅17.9%，行使價恒指14400，𠵱家輕微價內。未來幾日，恒指如果再升70點以上，揸隻輪有賺，否則蝕錢。個市分分鐘上落一二百點，食得鹹魚抵得渴，炒4748隨時賺3-4成，亦可以隨時蝕3-4成。
恒指P輪4812：恒指P輪4812收1仙，大散75%，做咗跌幅榜阿頭。隻輪年底到期，溢價9.4%，槓桿率359.5倍（有效30.3倍），引伸波幅19.6%。要恒指低過13400，隻輪先至有得剩。睇嚟，隻輪最後凍過雪碧。
章盛