光榮製作《三國志》就玩得多，今次由世嘉操刀嘅街機《三國志大戰》，就更有新意，將育成、戰術結合卡Game之上，玩家可享受到操控戰場，成為主帥嘅感覺，每勝出一場戰事，都會獲得升級，由最初普通一個指揮官，最後可以成為丞相甚至君主！遊戲今個星期剛落機舖，現場所見人人唱過百蚊煲機，絕對係呢期最熱新Game！
記者：許福合
攝影：陳智良
ImageGirl：小惠
排陣出戰好考究
開始玩時，先要買StarterPack，當中會包括有記錄玩家資料嘅君主卡，同另4張武將卡及卡套，售$50，而每局為$15！都算幾揦脷！
卡種類有普通白卡、黑卡、銀卡同金卡，以金色最罕有；特別之處，係即使同一個角色，都可能有唔同顏色卡，各自有唔同能力或技能，好似以最出名嘅諸葛亮為例，當然係金卡人物必然之選，不過亦有張肥版「武諸葛」嘅黑卡，能力大幅改寫，武力8，智力1！出戰武將使用「點數系統」，總點數定為8點，卡片左上角會註明正將點數；以一般金卡為例，最高消費可達3點，所以相對能出場武將會減少；正所謂三個臭皮匠，勝過一個諸葛亮，以最平最渣的「1點」武將，個人戰力可能會差啲，但8個武將齊出，隨時蟻多摟死象，戰法變化萬千。
戰術運用推卡攻城
同之前嘅足球卡機比較，《三》玩落更為實時！機面全個都是「感應器」，當排好陣勢、將卡移動，遊戲內所代表嘅軍隊亦會隨之移動，與敵方隊伍接觸，就會自動打起來，此外兵種還有相克特性，騎兵克弓兵，弓兵克槍兵，槍兵倒過來可克騎兵。
當敵軍殺退得七七八八，就可以展開攻城戰，前方凸出處就代表城門，全個城弱點所在，全力攻城同時，亦不妨派小隊到角位攻城，可令敵人走來走去，無形中降低敵方防守力！另外，每名武將因應卡嘅種類，會有唔同策略同技能，發動方法先將卡上下移動，再按下計略掣，隨之會見到計策發動嘅動畫，計略可使出火計、強化同指揮，玩法非常豐富兼多元化。
現知日本方面，已推出網絡連線全國對戰，香港方面則暫未有計劃引入；可幸遊戲還有店內連線對戰功能，喜歡PK友冇投訴啦！
金卡套裝炒上$3,361
據現時煲機友經驗所談，金卡嘅出卡機率尚算唔錯，平均8至14局就有一張金卡，而高手KT重教路，若想捕金卡，不妨留意一部機對上10局左右嘅出卡種類，因為一般金卡都係平均分配，若然對上10局都未有金卡出現，就可能代表金卡快將面世，呢個時候就係捕卡好時機！《三國志大戰》喺香港雖然新返，其實日本方面於3月左右已推出，有唔少特別卡，或武將卡已經被人抽出來，當中較為罕有嘅金卡，於日本Yahoo就被炒到飛起，其中最吸引係一套14張金卡，筆者寫稿時就標到51,000日圓（約港幣$3,361）！
機迷意見
日本打到香港
KT最早在日本旅行時已迷上《三》，手頭Game卡片過百張，重有超過10張金卡，當中包括諸葛亮、呂布金卡，另外重有可於日本Online對戰嘅EX卡（香港未引入），遊戲好玩在武將組合多變化，而且有各種戰術同特技可以使用，同一般三國遊戲分別好大。
三國人物好投入
《三》以熟悉嘅三國人物做基礎，玩家基本上都知道該名武將嘅特點同專長，排陣較易掌握，另外重可以進行店內對戰，有時會有武將PK戰，好襟玩！
遊戲資料
主機：街機
開發：世嘉
類型：卡片
售價：$15一局/$50StarterPack/君主卡$35
金沙遊戲機中心
地址：觀塘觀塘道410號地庫01室
電話：31682530
