杜汶澤近年喺影壇發展得意，重主持埋電台節目兼接𢱑銀活動，真係山大斬埋有柴。不過，可能因為已經同田蕊妮拉埋天窗，要負起養家重任，所以就連換車，都只係換二手黑色寶馬745LI房車。
新車價值百萬
杜汶澤前晚同導演彭浩翔以及一位女性朋友喺灣仔星街Olala餐廳共晉晚餐，見佢都幾開心，一邊食一邊手舞足蹈講唔停。到十一點左右，杜汶澤離開食肆，去附近街頭攞車兼做埋柴可夫送友人離開。
馮仁昭見佢部二手寶馬都幾新淨，行車證上面註明首次登記係喺○二年，發出日期係前日，即十一月十號，換言之杜汶澤一攞完車就同朋友遊車河歎西餐。
一查之下，原來杜汶澤部二手車係沿用舊車牌，至於𠵱家嘅車主登記就係一位田姓男士。噚日馮仁昭同杜汶澤傾電話，佢話呢位田先生係佢外父，因為架車係買畀老婆大人，而田蕊妮又會將啲嘢多數寫佢爹哋名。至於點解會買二手車，杜汶澤話呢部寶馬新車要成百萬，佢有個老友好少揸，重以一個超筍友情價蝕讓，咁佢就嗱嗱臨買咗囉。
