恭喜！恭喜！四十歲的吳君如與名導演男友陳可辛拍拖七年，近日成功造人，據可靠消息指君如已懷孕三個多月，前晚身形暴脹的君如穿上鬆身吊帶裙出席某雜誌派對時，行路時腰板挺直，明顯出現孕婦特徵，雖然她對懷孕一事既不承認也不否認，但上樓梯時好友李嘉欣即小心攙扶，又叮囑君如說：「你小心睇住呀！」
現年四十歲的吳君如近年先後主持電台節目《嘩！嘩！嘩！打到嚟！》和《她他她打到嚟！》，日前她更在節目中自爆行房地點，近日即見她身形日漸膨脹，原來與男友陳可辛拍拖近七年的她已懷孕三個多月。
腰板挺直
上樓梯嘉欣急攙扶
前晚君如與李嘉欣、黃秋生及黃耀明齊到中環出席「EternityofFameCelebrationParty」，獲頒發「EternityofFame」大獎，只見君如身穿鬆身吊帶裙，難掩微隆的腹部，但她對懷孕之說卻不願正面回答，只說：「遲啲你咪知囉。」而本報亦收到可靠消息，指君如確實有喜，目前已懷孕三個多月。
前晚現場所見，君如出入時都顯得十分小心，當她與好友李嘉欣一同上台時，嘉欣亦小心翼翼地扶着君如，又說：「你小心睇住呀！」而君如走路時腰板挺得特別直，與孕婦的懷孕特徵十分相似。當君如看到一群攝影記者拍照時，她即緊張地說：「你哋唔好行咁埋呀。」惟恐蜂擁上前的記者會撞倒她，她又此地無銀地說：「我之前整親條腰呀，腰度鑲咗鋼板呀。」
未來老竇
一邊否認一邊偷笑
問君如不願承認懷孕是否怕BB未夠三個月小器時，她說：「我自己唔迷信，呢啲太私人嘅嘢我唔想講。」提到王菲近日亦已公開承認懷孕，君如說：「我戥佢高興，但人哋還人哋，我自己唔想講私人嘢，下次見到我先再問我啦。」再問到君如會先生小孩還是先註冊？她說：「你哋慢慢觀察吓先啦。」君如連行房地點都不介意公開，為何不直言是否懷孕？她說：「嗰啲係之前細個嘅事，唔關長毛（指陳可辛）事。」
君如又謂即使懷孕也不會公開談論，希望保持私隱，她說：「就算我有BB，喺邊度生，都唔講。」問她會否向羅美薇等好友請教？君如說：「唔會，我唔攞人哋嘢出嚟講。」但問到其好友曾華倩與馬國明的緋聞時，君如卻大方地為好友否認，她說：「佢梗係唔係啦，佢真係拍拖就唔會成日打畀我啦，我識佢咁耐都冇問感情嘢㗎。」問君如會否繼續拍戲時，她認真地說：「你哋已經假設我係有咗，我會話我有咗都會繼續拍戲囉。」至於被問到好友嘉欣有否恭喜她時，君如煞有介事地說：「冇，我只係行樓梯時佢叫我自己小心啲。」
另一方面，快榮升爸爸的陳可辛昨日到演藝學院出席「亞洲文化合作論壇」，當他被恭喜快為人父時，即一邊否認一邊偷笑，表情趣怪，他說：「唔係嘛？我都唔知喎。」問他是否怕BB小器才不公開？陳可辛謂：「唔係，梗係唔係啦，乜你哋問啲咁嘅嘢。」提到君如前晚曾接受訪問，陳可辛即緊張地追問女友說了甚麼，得悉君如謂懷孕也不會講，他即說：「咁咪係，咁你哋重問我？」陳可辛又謂沒有計劃造人，又笑言君如懷孕也不關他事，陳可辛笑說：「關我乜事？未必關我事㗎喎。」
阿澤封口
「我唔會做二五仔嘅」
記者昨日致電君如好友杜汶澤求證時，他說：「關於吳君如啲嘢，你問佢佢唔答，我亦唔會代表佢答你嘅，我係唔會做二五仔嘅，你係唔會喺我口中得到真相嘅。」其實君如早前接受本報訪問時曾表示十分渴望生BB，又表示若五年內不能懷孕會考慮領養，而君如亦曾私下向友人透露近年一直努力造人。
此外，君如日前在電台節目中大談其行房經歷，問她會否怕陳可辛生氣？君如說：「真真假假睇你哋信唔信，我又冇講係邊個同幾時，冇理由吓吓講任何嘢都問佢。」
採訪：張俊銘 攝影：陳慧安
