緊急召集！有傳彭福公園就嚟清拆，我哋快啲趁機出嚟玩翻轉先！」哥基坊早前舉行「吻別彭福」活動，有成二十幾隻哥基出嚟相聚，奉旨喪玩一日，佢哋除咗玩吓拋波仔追逐吓之外，原來重會追女仔，眼見阿Jay同33一見鍾情咁投契，兩位狗主差啲要即場傾定禮金過大禮！弊！突然殺出一個程咬金阿朦，究竟哥基女會揀邊一個？
記者：曾靜茵
攝影：陳智良
鳴謝：哥基坊
當日非常熱鬧，足足有成二十幾隻哥基聚首一堂，眼見隻隻都腳仔短短，豎起對大耳仔非常得意。弊！隻隻都差唔多樣嘅，認唔到邊隻打邊隻㖭！好彩各位狗主都好醒目，幫佢哋戴番條領巾仔，以巾識別。
偷食媾女亂咁嚟
起初隻隻狗仔都好乖咁玩吓拋波仔，追逐吓咁，誰知會長Color媽一到，即有人大叫：「Color跳上嚟偷嘢食呀！」當各人同狗都忙於捉住Color之際，站在另一邊的阿Jay一於好少理，專心咁四周尋覓對象，最後鎖定目標，以「死跟」的方式，最終奪得美人歸。而在旁的狗主都話：「阿Jay同33好似孖公仔咁，我諗你哋都要傾定禮金同過大禮啦！」
追女四部曲
撬牆腳跑到索氣
誰知當大家都鐵定阿Jay同33係一對嘅時候，突然殺出一個程咬金，佢就係杉杉有禮的阿朦，佢以情深款款的眼神，目不轉睛咁凝望33，當33奔跑而去時，阿朦亦跟住跑，主人Winnie話：「平時阿朦叫極都唔會跑㗎！連快步行都懶！佢今次真係好認真咁追女仔！」阿朦的付出並無白費，33最終瞓身以表愛意，令全場捧腹大笑。
自家繁殖影響下一代
哥基坊會長Maggie眼見狗狗們一見鍾情都非常開心，不過亦都建議各位狗主，最好要同愛犬做絕育手術，因為自家繁殖或配種，好容易會將遺傳病延至下一代。另外，她亦建議想養狗的人士，最好選擇領養，因為無論名種狗或是被遺棄的狗隻都是有生命。
天生狐狸相
哥基的樣子同狐狸好相似，但就一啲都唔似狐狸咁狡猾，佢天性活潑、喜愛與人接近、懂得取悅主人。佢對耳朵會豎起，對聲音好敏感，四隻腳仔短短但非常結實。哥基犬只高25-30cm，體重方面，雄性比較重約12.3kg，而雌性體重則為11.4kg。
活動花絮
英女皇愛哥基
眾所周知，英女皇伊利沙伯二世最愛短腳的哥基犬，她的第一隻哥基犬是於1944年由父母送畀佢，名叫「蘇珊」，𠵱家女皇一共養咗七隻哥基犬，全是蘇珊的後代。
