細路豪猜燈謎，覺得好過癮，中午飲茶之時，纏住左丁山不放，係要猜多幾個。左丁山畀佢之謎面（見前日本欄），係今年參加新春團拜之時見到嘅，肚皮內邊度有咁多墨水，但見到細路豪個款，唔想潑佢冷水，於是叫佢去體育學院打網球先，下午去書局買本謎語書畀佢睇，最好就係由佢老竇照書讀謎面，細路豪估謎底，每日玩十五分鐘，睇吓有冇效果。你知啦，細路仔小學生，好容易快上癮，快冇癮，一個禮拜之後就會唔鍾意玩㗎嘞。
於是到中環三聯書局買書，書局內只有一本燈謎書，略為失望，諗住有三四本嘅話，就一口氣買晒，以備後用㗎嗎。卒之買咗呢本叫做《最新燈謎集成》，台灣文國書局出版，管梅芬主編，一九九八年版。送咗畀細路豪嘅爹哋工程W。工程W話多得左丁山唔少，以後怕會俾個仔煩親！
過咗兩日，打電話畀工程W，問細路豪睇燈謎睇成點，細路豪知道左丁山來電，搶電話聽，問番轉頭：「嗱，輪到我考你，呢本書有好多謎面，睇吓你識唔識？我唔識分幾多個蘋果㗎，總之我睇得明嘅就考你，聽住咯噃：（a）風平浪靜，猜中國地方名；（b）雙喜臨門，猜中國地方名；（c）心無二用，猜四字成語，（d）不及黃泉無相見，猜口語；（e）籠中鳥，猜三國名人，（f）三十七計，猜成語。」
諗咗一輪，諗到前五條答案，（f）唔識。答案係（a）寧波，（b）重慶，（c）一心一意，（d）幽會，（e）關羽。細路豪笑到㗎㗎聲，佢話本燈謎書嘅絕大部份係佢唔識、唔明白嘅，只係揀咗一啲淺易嘅嚟睇，再加上老竇講解何謂幽會，佢就更加明白多啲。至於（f）嘅答案係乜嘢呢？謎底原來係「無計可施」，都幾絕，古有三十六計，用完晒都唔掂，要搵到第三十七計，咪無計可施囉。