安雅的寫真集《Becoming》雖然已拍竣多時，但她昨日卻表示，為一改以往性感形象，故未有打算推出。其後她又表示，如有發行商出高價購買全輯照片及短片，露點寫真集定能與觀眾見面。前言不對後語之餘，更有公開搵老細發行寫真集之嫌。
安雅身兼模特兒及製作人的寫真集《Becoming》，雖然早已拍攝完畢，但遲遲未推出，早前她遠赴英國倫敦拍攝外景，更特別邀請新加坡籍導演DucLuu為她拍攝片長達八十分鐘的短片，而該短片最近更成功入圍新加坡電影節角逐短片部份「最佳導演」獎。
轉型做乖女
昨日安雅衣着密實，聯同導演DucLuu於尖沙嘴舉行記者會，除宣布該短片獲提名角逐「最佳導演」外，亦解釋該寫真集遲遲未推出的原因，她說：「因為近排喺內地拍劇，主要演乖乖女嘅角色，始終唔想一直畀人感覺好性感，所以我覺得目前唔係好適合推出，但幾時出就唔知。」
玩制服誘惑
雖然安雅自稱寫真集推出無期，但她透露寫真集及短片內均有其露點的鏡頭，故希望有發行商能合作，安雅說：「如果有發行商買，咁寫真集嘅照片同短片就會公開發售，當然價錢唔會太低喇。」
安雅表示寫真集總投資達七位數字以上，當中安雅除大騷其魔鬼身材外亦大玩制服誘惑，其中更有胸部大特寫的鏡頭，她說：「因為今次主題係男人嘅夢想所以都有學生妹look、SMlook及女拳手等，其中比較大膽係我同一個女性胸對胸影相。」而短片內容亦收錄所有拍攝過程及訪問片段，實行以她的真實一面示人。
採訪：王崇穎 攝影：何榮亮
