證券經紀界對銀行推出低佣甚至免佣搶客早有微言，今日部份經紀團體喺報章刊登廣告，再次公開反對當局取消最低佣金制，又指摘銀行不公平競爭。不過，參與聯署嘅只有張華峰揸旗嘅證券學會、蔡陳葆心嘅證券商協會，以及證券期貨業職工會，再加上立法會經紀業界代表詹培忠；另一龍頭組織證券經紀業協會就冇同佢哋一齊玩，只係另外出咗一份措辭較溫和嘅聲明畀各大傳媒，話支持透過公平競爭法解決問題。
雖然有經紀咬牙切齒，但一路做開低佣嘅耀才證券，噚日就發咗一份聲明，公開支持自由佣金制，話有競爭才有進步。有經紀話，咁正正反映業界各有睇法，一啲人又唔想同政府對着幹，咁點樣同當局抗爭？