投資推廣署署長盧維思位夫人黃麗君，係威猛傳媒人，幫過曾蔭權競選特首，最近傳曾特首會搵番佢幫手做特首辦新聞統籌專員。噚日盧維思同記者茶敍時被人問起呢件事，佢笑笑口話老婆唔多同佢講嘢，就算講都係決定咗之後，先話聲畀佢聽。不過，佢估老婆都唔會打政府工，因為𠵱家已有份全職工作，又喺電台開咪，佢重爆料話曾特首都曾經講過，唔夠錢請佢太太做全職喎。
講完私事，佢又同記者介紹上個月，投資推廣署聯同廣東省黃華華省長，一齊到美加做聯合推廣，結果分別有超過一千名當地商界人士出席。佢話除咗吸引海外投資者到區內投資，又可以加強同廣東省嘅合作，咁日後國企嚟香港就更容易。
傳真︰2623-9278
電郵︰[email protected]