總商會主席艾爾敦一直被認為係「中東通」，對中東的風土人情認識深厚，點解？大家睇睇艾爾敦在中東地區的工作經驗：1968年加入滙豐集團，過後約20年內，前後4次被調派到中東地區工作，曾經駐過杜拜、阿聯酋的沙迦及哈伊馬角、沙地阿拉伯等。據講，艾爾敦與太太的一段情緣，亦是開始於中東工作期間。
身為貿易發展局理事會成員的艾爾敦，近日帶領200多名港商到杜拜，出席為期4日嘅大型香港產品展覽會「香港時尚匯展」，稍後又同香港總商會組織的商貿代表團，往訪伊朗的德黑蘭，圖中所見，就係艾爾敦參觀一名港商的工藝品及珠寶首飾展位。
自從艾爾敦退下滙豐大班之位，曝光減少咗好多，昨日總商會午餐會請肥彭演講，華華諗住艾爾敦係主席，點知在現場都見唔到佢，一問之下，方知艾爾敦去咗中東，回港的班機大約下午5時才到；因此無法出席午餐會，同肥彭暫時緣慳一面。
李華華