N6111潮玩番梘Look纖細又滑溜

最近唔少「機場」Sales都話，Nokia呢期「科技」二字當頭，內置200萬像素鏡頭，玩插卡嘅機種比比皆是，但係以纖細、輕巧嚟打頭陣就相當罕見！話口未完，「諾記」又嚟一次突襲！N6111熟口熟面之處，除咗喺6月新加坡預覽展入面見過之外，其滑蓋式設計更滲出濃烈「韓Phone」味。至於最抵死嘅係，N6111的骰得嚟形如番梘般賣相，圓潤滑溜，試問愛靚嘅女士又點可以睇漏！

記者：陳國輝
攝影：陳陶鈞

極細！DC手機雙面設計

所謂「雙面」設計，就係一面用手機操作，另一面用DC操作咁解！呢種玩法較常出現於日、韓機身上，玩到落N6111可謂少見！機身正面只有五方向掣以及兩個功能掣，就算唔將機蓋滑出，仍然可操作手機任何「分唇」，勁方便！
至於反轉之後，佢會變成一部僅重92g嘅MiniDC，玩家只需要利用機側快門掣及變焦掣就可以操控，玩法簡單；除咗鏡頭達100萬像素，影完相重可即時插入搞鬼圖案，就算照片質量唔及專業DC咁「Pro」，但N6111勝在外形的骰、可愛，實引死唔少女仔！

■影相嗰陣要橫度操作，左邊調校變焦，右邊㩒快門！

■背面係DC設計，好簡約！

■厚度約相等於一個五毫子。

■採用最新操控介面，唔使滑蓋都可操作。

■鏡頭兩邊有自拍鏡及補光燈，都可謂五臟俱全。

慳位！SIM卡電池分開擺

究竟咩叫做將資源用到最盡？為達到機體激細效果，Nokia繼去年部「筆型手機」7280之後，N6111再次採用SIM卡與電池位分開設計，重唔使犧牲數字鍵盤㖭！今次，N6111將SIM卡設於唔當眼嘅滑蓋背面，而電池就分開放喺DC機殼入面，就算有需要更換SIM卡，亦唔使拆電咁麻煩！
不過，為求「KeepFit」，某啲功能亦可能因此被削弱。例如，機身為慳位只能裝設一隻喇叭，如果唔用Hands-free嘅話，都幾難聽得出立體聲效果。究竟想要靚樣抑或較強嘅「分唇」，咁就見仁見智喇！