大馬主吳守基捐錢二百萬元畀特區政府籌辦二○○九年東亞運動會，好唔話得。吳守基名下有一匹「馬友寶」，長途實力強橫，係左丁山心目中今季之「銀行馬」，吳媽媽有「通勝」及「新通勝」係冷門取勝分子，不可或忘……吳守基係紡織界人物，與「星哥」陳耀星等朋友組成「詠湛」賽馬團體，養咗兩匹「友活力」、「友實力」，實力就比較次一皮，唔使吼到實。吳守基係喇沙校友，而喇沙素以體育運動著名，所以佢係體育發燒友，一啲都唔奇。
東亞運動會若果唔係在澳門舉行，香港相信冇乜人會注意到，睇有線電視直播一啲比賽，唔知係唔係鏡頭關係，田徑場上觀眾席，足球場上中日大戰，籃球場上中國對南韓，硬係唔見咗一啲嘢，就係觀眾嘞，啲觀眾去咗邊呀？想深一層，澳門人口少，個個要返工返學，唔得閒去睇，遊客去晒葡京、金沙，唔會去睇，於是看台上小貓三四隻，好似旺角球場睇香港甲組足球咁多人，全無氣氛。
○九年東亞運動會喺香港舉辦，有冇觀眾呢？好似喺將軍澳搞噃？場地如何呀，比唔比得上澳門，全部唔知，只好信賴民政事務局與霍震霆會在四年之內將一切安排妥當，更希望藉此推動啟德機場變身成運動城。啟德運動城之議，係發展啟德三個構思之其中一個，隨時會變成「西九文娛藝術區」翻版，拗餐懵，十幾年後仍未能成事。
左丁山好主張拆咗政府大球場，將一半土地拍賣起豪宅，一半做番公園，應該好值錢。將啲錢擺落去興建一個九龍東大球場/田徑場，相信夠錢有突。有咗一個似樣嘅奧林匹克運動場，香港就有資格主辦大型運動盛事嘞。老問題係搵人入場，睇怕○九年之時，霍公子要搵埋工聯會合作，日日派飛請人去坐滿三分一個運動場，墟冚過澳門至得。