煲呔上位，政界笑說係舊港英政府回朝，可惜thosewerethedays，今時唔同往日；立法會議員冇一個係政府委任，結果肥龍許仕仁日日乞票都唔掂。
過去嘅美好日子本來一去不復返，不過噚日傍晚，有成五十幾位八五至八八年度嘅立法局（九七年之前叫局）議員同當時嘅職員一齊喺立法會議事堂出現，聚首一堂，影完大合照之後，重走晒去香港會聚餐，開足五圍。
又真係好齊人喎，移居英國嘅鄧蓮如女男爵都有到，久未露面嘅施偉賢亦係坐上客。八十九歲高齡嘅大Sir鍾士元當年係行政局首席議員，係噚晚嘅GuestofHonour。
八五年嗰屆立法局係香港政治發展嘅里程碑，因為由嗰屆開始，香港立法機關率先引入間選，即係功能組別；之前所有立會議員都係港督委任嘅，你話幾好做，邊個唔舉手支持政府，下次咪唔委你入局囉。所以阿姐鄧蓮如都話，回顧過去呢二十年，覺得一切都係由八五年開始，由當年踏出政改第一步。
鄧大姐重特別多謝當時兩局議員辦事處嘅職員，佢哋全部都係由公僕借調過嚟，當中有政務主任，好似蕭炯柱、許仕仁同埋李麗娟，大姐話佢哋幫咗唔少手，好似蕭炯柱同佢一齊練習第一篇發言稿，肥龍就勸過佢要冷靜啲勿動氣等。
咁肥龍都有講吓笑話，話原來當年調入兩局做嘢都要過幾關考試，唔係話去就去，當時利Sir（利國偉）、鍾大Sir同方心讓坐喺度問問題，問你有乜資格可以幫到佢哋，都唔易答。
鍾Sir心水清逐個數
成班「老餅」敍舊話當年，梗係玩得好開心啦，鍾士元重好心水清，頭腦靈活，佢話，八五年嘅議員真係好叻，出咗兩個主席，一個係施偉賢，一個係由直選產生嘅范太；又出咗兩個女爵士，一個係鄧大姐，一個係王䓪鳴；而周梁做到今日，重入埋行會；至於馬丁同華叔就仍然係民主鬥士。職員方面重威，當年嘅副秘書長肥龍，今日做埋政務司司長。
講完啲正經嘢，王䓪鳴就轉話題，問邊個認為自己條腰粗咗就企起身，除咗鄧蓮如之外，差唔多人人都站起來，而問到邊個堅持獨身，就有華叔同葉文慶。
中間聽講馬丁同阿飛重大講三級笑話，噚晚真係猛人盡出，最後重高歌一曲《Thosewerethedays》先肯歸家。
八方問大搞手李麗娟，佢話下次聚會時間係二○○八年，到時香港政制會變成點就冇人知喇，不過，眾人媽打相信政改一定有料到喎。噚晚係AA制，各人畀五百大元，認真抵玩。
傳真︰2623-9278
電郵︰[email protected]
