安德利果汁（8259）呢頭話蘋果失收，嗰頭海升果汁（359）一上市就跌破底價。噚日安德利公布今年頭9個月業績，盈利增長15％，海升股價立即升番7.7％，收0.70元。經紀陳話，世事邊有咁啱，江湖傳聞有人正在努力向投資者推介海升，目標係升番上招股價0.83元。
海升昨日成交股數1639萬股，金額1133萬元。至於安德利就跌3.37％，收0.43元，成交股數683萬股，金額306萬元。
海升喺上周五掛牌，首日掛牌就大跌23％至0.64元，其後更一度質至0.58元，有貨者真係睇見都覺得傷心。聽講有個芬佬上市時，認購海升接近7％權益，揸得咁重貨，擺明係好有信心。不過，由於股價一開波就大跌，令捧場客大失信心，為咗重拾投資者信心，睇嚟有關人等要畀多兩錢肉緊先掂。
另外，靜咗一排嘅鱷魚恤（122），將在下周五公布全年業績，昨日股價已經先行炒上，升14.64％，收0.47元，成交金額330萬元。
慕容小初