港股前日急升後，昨日大部份時間牛皮，去到尾市，再好啲，恒指埋單有35點進帳。建行（939）繼續去，個市氣氛唔會差得去邊。恒指收報14633，有機會升上14800/14900，除非禽流感出現大大嚇人新聞。
國壽C輪3487：3隻國內保險股都造好，國壽（2628）收5.80元，升5仙，估計有機試一試6元大關。
搵國壽C輪短炒，3487諗得過。隻輪明年2月夠鐘，輪價43.5仙，溢價4.1%，槓桿率13.3倍（有效8.7倍），引伸波幅27.7%。國壽C輪有其他選擇，視乎炒家賭性而定，如果想刺激啲，揀槓桿率大嘅，則向4702埋手。
4702明年1月中到期，輪價0.173元，溢價8.2%，槓桿率33.5倍（有效12.7倍），引伸波幅28%。
中移動C輪9217：中移動（941）升25仙，收35.85元，走勢繼續反覆向上。港股如果轉穩，中移動唔會衰得去邊。揀中移動C輪短炒，宜揀低溢價嘅，例如9217。隻輪明年2月中到期，輪價57仙，溢價2%，槓桿率6.3倍（有效5.4倍），引伸波幅31.7%。
恒地C輪：恒地（012）私有化恒發（097），恒地跌，恒發急升。11隻恒地C輪2隻升，1隻無升跌，其餘8隻下跌，恒地暫時好難升，C輪咪搞。
章盛