薛家燕（好姨）近日在新加坡拍攝劇集《愛的獎門人》，劇中與風水師鄰居朱厚任有情人終成眷屬。二人日前拍攝盛大的結婚戲，穿上婚紗的好姨笑言這結婚場面，正好應驗相士預言她今年會紅鸞星動。
薛家燕最近在新加坡拍攝劇集《愛的獎門人》，在劇中扮演一名經營婚紗店的單親媽媽，與三個女兒一起生活，雖然扮演其前夫的陳澍城浪子回頭要求復合，但好姨卻與風水師鄰居朱厚任相愛，有情人終成眷屬。
好姨日前為拍攝這幕大團圓結婚戲，特別穿上當地設計師TedWu為她訂做的婚紗，她說：「女人着起婚紗真係最靚嘅，絕對無可否認。」而好姨為以最佳狀態上陣，拍攝前一晚特別往做面膜，她說：「我敷緊面膜時，家姐咁啱打電話嚟，佢重笑我咁緊張拍呢場戲，真係應驗咗相士之前話我今年會紅鸞星動，認真搞笑。」
問到好姨認為劇中新郎朱厚任可是其夢中情人形象？她說：「係㗎，佢好有風度，亦好有型，可惜現實生活佢都結咗婚，係一名好老公。」
有痴心追求者
好姨表示朱厚任拍完這場ending戲後對她說：「佢話好多謝我喺呢次合作中，畀咗一段咁圓滿嘅回憶佢，尤其呢場我哋嘅盛大婚宴，我拍嘅時候都好感動，大家都拍得好投入。但我之後就同佢講，套劇一完，大家就要抽離角色。」好姨為拍《愛》劇在新加坡逗留三個月，離開時對劇中三個女兒依依不捨，她說：「臨走時我一人送咗一個『家燕媽媽』公仔畀我劇中三個乖女，佢哋猛話唔捨得我。」
此外，好姨前晚出席利嘉兒與周國豐的婚宴時，自爆在新加坡被一名五十六歲的痴心男子追求，她說：「佢話等咗我九年，重話之前睇到我有個緋聞男友，好失望我點解唔揀佢喎。」
採訪：比華利
