今周末五場世界盃外圍賽附加賽以外,重有幾場友賽穿插其中,當中精選就包括改喺今日開波嘅巴拉圭,周六早場嘅南韓,以及較後時間進行嘅美國。華度
今日喺伊朗有兩場友賽進行,賽事名為德蘭盃,性質就好似我哋香港嘅賀歲盃咁,共四隊角逐,今日捉對打初賽,勝方喺兩日後爭冠軍,負方就打季軍戰。
四支球隊除咗亞洲嘅主隊伊朗,重有歐洲馬其頓、南美洲巴拉圭及非洲球隊多哥。足智彩突於噚日下晝決定,為今日嘅巴拉圭對多哥(球賽編號:星期五1;香港時間今日9:30pm開賽)呢場比賽開盤。
多哥雖於早前爆大冷,喺外圍賽騎住塞內加爾,搶得明年世界盃決賽周入場券,但呢班波陣中其實冇乜球星,相信都係塞內加爾班球員一時唔爭氣,至俾多哥成功突圍。今日呢支世界排名四十九嘅非洲隊,出年可唔可以喺德國綻光芒就重係未知數,但今日鬥排名三十三嘅巴拉圭,真係唔值睇好。
瑞典殘陣征韓唔夠踢
聽日賽事,早段搵食波可吼南韓W,佢哋呢場主場對瑞典嘅友賽,強陣應戰,朴智星、李榮杓、安貞煥、薛琦鉉、車斗里及李乙容六位外流猛將,全部歸隊,睇怕都係新帥艾禾卡特想再省靚個招牌。瑞典方面,伊巴謙莫域、拿臣、龍格保、馬貝治及門將伊沙臣等正選,全部缺陣,教練拉格碧利話想試新人喎!
夜晚賽事,可以搵美國作客蘇格蘭嘅平手盤玩玩。美國打友賽出名認真,尤其係去到歐洲作賽,近年就贏多輸少。○四年就贏過波蘭一比○,及僅負荷蘭○比一。呢場波美國陣中成員就有燕豪芬中場比士利及富咸射手麥拜迪等猛將,蘇格蘭嗰邊,呢輪當頭起嘅韋根中場麥高洛因傷退隊,射手堅尼米拿及些路迪嘅C比亞堤亦有傷無入選今次友賽大軍。