周初馬會公布嘅今周末暫定受注球賽表，並未有今日喺伊朗中立場進行嘅德蘭盃賽事：巴拉圭鬥多哥。但其實呢個賽事，今日尚有另一場伊朗主場鬥馬其頓進行，但足智彩就無開盤。事實上，主隊一向喺呢啲賽會制賽事中贏面好高，甚至乎外圍莊家都冇為伊、馬之戰開盤，馬會又點會貿然自己開個盤畀大家玩呢？
伊朗鬥馬其頓冇開盤
不過，呢個賽事喺下周日將會進行季軍戰及決賽，暫時未見馬會嘅賽程表有顯示會受注，或者因未知到時邊隊鬥邊隊（今日勝方爭冠軍、負方爭季軍），聽日或者又會加開呢兩場波受注都未定。
講番呢兩日比賽，聽日日職聯打足九場，現階段呢個賽事已進入最後直路，爭冠分子榜首隊大阪飛腳，將鬥第三位嘅浦和紅鑽，為最矚目戲碼。大阪飛腳啱啱失落咗個日聯盃，肯定更加喺聯賽搏老命；有主場優勢之餘，贏波亦可消去浦和紅鑽嘅威脅，單Ｗ值得捧場。
文：華度