劉敢針做咗咁耐醫生，近日最受親戚朋友歡迎，佢哋好多人平時好少打招呼，好少幫襯，但係最近都頻頻打電話嚟，問診所有冇流感針打；重有，有冇特敏福？！
呢個真係拜禽流感四圍爆發所致，劉敢針嘅答案永遠係：「重有，不過係留畀我啲職員用。」其實遇到呢啲情況，身為醫生有時都覺得無能為力。醫學界一直呼籲大家要打流感針，香港人以往唔會理，但係沙士之後，大家警覺性高咗，打針人多咗。之後冇事，又馬上降溫，𠵱家禽流感臨門，大家又大為緊張，真係冇辦法。
雖然話，打流感針未必對禽流感有用，但都係好重要嘅。第一，萬一禽流感真係殺到，你就唔會咁易被人誤會中招捉去醫院檢驗，因為你染流感機會少咗；第二，就係可以預防洗牌效應，唔使搞到全人類都唔掂；第三，有啲高危一族好似長者、慢性病患者真係要打，最近衞生防護中心重發出新指示，叫孕婦同出世六個月至二十四個月嘅嬰兒都一律要打針。
劉敢針都係港大出品，唔明徐立之校長點解話佢自己唔打流感針，佢係科學家，有佢嘅睇法，總之班醫生就摸不着頭腦，唔知點解佢咁講。
特敏福好易炒燶
大家咁驚，藥廠就坐地起價，以前一劑針四十蚊，現在加到八十蚊都有，至於特敏福就炒得更高，因為個個爭住要買，供不應求。不過，大家千祈唔好全民去買特敏福，唔單只貴，最緊要係好快過期。目前都唔知禽流感幾時殺到，加上政府話過有足夠儲備，到時一定會攞出嚟用，使乜上太多貨，搞到有需要嘅人冇藥用，冇需要嘅就大把喺手，最後重過期報銷。
劉敢針請大家聽吓周一嶽局長講，「搶特敏福嘅人快啲收手。」其實呢句話好有含意，因為醫學會會長蔡堅噚日就爆料，話聽到上海好快會生產大量特敏福，即係話遲啲有平貨啦，你炒埋咁多貴藥，就好似早排啲人炒樓，分分鐘焦頭爛額。
傳真︰2623-9278
電郵︰[email protected]