梁漢文十三歲時已教小學生踢足球，日前他「重操故業」教小朋友踢波。梁漢文表示踢波基本功離不開控球、盤球和傳球，勤下苦功才能有所成就。
梁漢文（Edmond）五歲開始踢足球，十三歲當教練，在YMCA教小學生踢波，更是當年唯一入選YMCA足球隊的中國人，十六歲時躍身為香港足球代表隊青年軍，三年的嚴厲特訓，不僅令他球技大進，更醫好他的哮喘病。
射波重心向前
Edmond早前在旺角球場教小朋友踢波時，表示踢足球有三大基本功，就是控球、盤球和傳球，他說：「交波位置一定要準，有啲人連呢樣嘢都唔正視，咁個波就畀唔到目標，所以踢波一定要由最基本學起。」
Edmond慣用右腳踢球，他說：「踢波基本係用腳後跟同腳趾公中間凹入部位（足部內側）踢波，射波時重心要向前，個波先射得遠，而唔係將個波向上射。」Edmond又教路可用正腳背和腳外側來踢。
談到控球，Edmond則說：「控球有好多方法，腳背、腳內側、腳底、大髀、腹部同胸部都可以控球，睇住個波飛過嚟時，就要諗定用邊個部位控，用唔同部位控球，四肢配合都唔同，但頭部一定要保持穩定。」
越過敵方靠呃
至於盤球，Edmond謂這與球員的踢球技巧掛鈎，沒有固定技術可言，盤球越過敵方守軍，就算成功。他說：「記得保持頭腦冷靜，睇實隊友同敵方喺邊，控球喺自己身邊。」假動作是盤球中最常用的一種伎倆，Edmond邊示範邊說：「其實靠好戲，要呃到人，例如你表現出嚟想去左邊，等敵方向左，你一個轉身其實係去咗右邊，對方發現時已經追唔切，咪成功扭過敵人囉；或者跑跑吓急停，然後轉身改變方向都可甩身。」
採訪：蔡如玉
攝影：林德雄
