新世界發展喺啱啱過去嗰個禮拜六晚，與美聯集團聯手，喺何文田君頤峰，搞咗個大型酒會，除咗招待君頤峰業主，又請埋附近帝庭園、京士柏山及爵士花園業主參加。
美聯物業何文田助理營業董事陳泰圖話，嗰晚酒會，總共吸引到超過四百人出席。
有見及此，發展商與地產代理今個周末再度聯手，開多兩場。今次酒會仍然安排喺君頤峰第八座三十三樓複式單位內舉行。
另外，美聯早輪宣布，君頤峰業主，如果轉介親友，經美聯購買君頤峰單位，新舊業主可以得到美聯送贈一年管理費。美聯話，呢項優惠反應唔錯，所以𠵱家決定繼續送贈。
何文田君頤峰，總共有八幢住宅，七百個單位，面積由一千零十一至複式四千一百三十六呎，發展商賣咗幾年，𠵱家得番四十幾個高層貨尾，叫價每呎八千二至八千五。
電郵地址：[email protected]