平時大家喺電視睇英超直播波嘅時候，除咗聽住啲講波佬響度大噴口水之餘，留心啲聽其實可以聽到現場球迷響度自由大合唱。場波刺唔刺激，入球多少，我哋啲球迷控制唔到，但我哋可以靠唱歌去控制現場氣氛；無論係一家大細、三五知己抑或三唔識七都好，只要肯開金口放膽去唱，場波一定好睇好多！文/圖：LondonJon
上個星期有個香港球迷寫e-mail畀我：「LondonJon，我呢個周日專誠飛過去英倫，睇曼聯大戰一哥車路士。作為曼聯迷嘅我已經作好準備。兩個多月前從曼聯網買咗波飛，又從報紙旅遊版攞晒啲參考資料，加埋我自己十多年珍藏嘅曼聯波衫，到時我身穿最新嘅紅魔波衫，左手揸啤酒，右手揸旗，肯定成個標準英國球迷咁！」我覆e-mail問佢：「你練咗歌未呀？」乜歌？當然就係開波前唱，入波又唱，贏輸波都唱嘅球迷之歌啦！如果你唔識唱，千祈唔好話係地道嘅英國球迷！
曼聯會歌唱片曾賣斷市
每支球隊，每個球員都有自己一支名曲，以球會歌為例，歌詞大多數係關於球會嘅歷史，豐功偉績，贏過乜盃物盃、有啲乜猛人效力過等等。名氣大又畀得起錢嘅球會，例如曼聯就曾經請晒成隊波去錄音室炮製一支富有特色又有代表性嘅經典金曲「GloryGloryManUnited」。當年喺一個曼徹斯特嘅電台長居三甲，推出唱片亦賣斷市。時至今日，你都可以喺OldTrafford開波前聽到呢首歌。當然，亦有啲失敗例子，好似當年列斯聯有樣學樣，推出球員大合唱CD，唔知係班球員唱得差，定係唔夠靚仔，唱片無人問津之餘，重成為球圈一大笑柄！
球員嘅歌就千變萬化得多，一個球員可能會有幾首歌，喺唔同嘅場合對唔同嘅對手唱唔同嘅歌。例如紅魔前鋒朗尼有個射門機會，差少少入波，fans們就會唱：「Rooney'sgonnagetyou!」曲調取自俄羅斯女子合唱組合T.a.T.u名曲Notgonnagetus。又或者係取笑朗尼嘅前度球會愛華頓：「Waynewouldratherbeadevilthanascouse!」意思係朗尼寧做紅魔鬼，不做愛華頓嘅敗家仔。
高歌唱和如夢幻劇院
歌頌領隊嘅歌就比較悶，來來去去都係將個領隊個名不斷重複咁唱。雖然係咁，啲球迷都偶有佳作，例如費爵爺喺後備席走出嚟大聲「啐」班球員嘅時候，呢邊龍門後面嘅球迷就大唱：「Ferguson'sRedandWhiteArmy!」同一時間，喺大看台高層嘅觀眾就跟住節奏拍掌，一邊唱，一邊和，盡顯夢幻劇院「TheTheatreofDream」嘅王者氣派。
最後講單歷史趣聞，每當有新球員加盟，球迷都會準備好新歌迎賓，話說當年法國守將拿保夫加盟車路士，球迷為佢作咗首「He'shere,he'sthereHe'severyFxxkingwhere,FrankLeboeuf,FrankLeboeuf。」但係成個光頭神探咁嘅拿保夫，向球迷表示唔想大家教壞細路，希望大家玩還玩，唔好咁「低級趣味」，於是每逢拿保夫喺球場上滿場飛殺波，又或者救到個空門時，球迷就改唱：「He'shere,he'sthere.We'renotallowtoswear,FrankLeboeuf,FrankLeboeuf！」
