名模陳沛嘉、黃耀明、黃家諾同周倩圯前晚喺中環出席HennessyV.S.O.P舉辦嘅音樂派對，陳沛嘉重帶咗個男伴亮相，呢個男伴就係曾經喺無綫劇集《書劍恩仇錄》裏面飾演紅花會總舵主陳家洛、外形略胖嘅彭文堅。
彭文堅係靚酒
據講陳沛嘉同彭文堅嘅戀情喺幾個月前開始，早排陳沛嘉牛一舉行派對，彭文堅重好似男主人咁招呼賓客㖭。前晚記者當然追問陳沛嘉嘅戀情，但佢唔肯正面回應，只係話：「佢係一個好錫我嘅朋友，大家好啱傾，真係好開心。」
陳沛嘉重以酒嚟形容彭文堅：「好似飲酒咁，有少少醉。」對方係咪靚酒？佢話：「係囉，會醉囉。」
而黃耀明就話自己酒量好淺，問到佢有啲創作人有吸毒同酗酒嘅習慣，明哥話：「自己係自己嘅主人，唔需要咁樣搵靈感。」明哥又話見過朋友喺酒吧吸毒，嚇到佢唔知點算好。
