一直拒絕回應感情事的李嘉欣，自龐維仁公開承認與她分手後，前晚在北京首度開腔，坦言視龐維仁為特別的好朋友，強調自己認識他時對方一個人住，又指整段三角關係中存在很多謊言，但並非來自龐維仁，矛頭直指黃美儀。
李嘉欣前晚現身北京工人體育場，以愛心大使身份出席「母親水窖巨星慈善大匯演」。龐維仁日前公開表示已與李嘉欣分手，同時亦會與妻子黃美儀離婚，一直不肯回應此事的嘉欣，前晚身處氣溫僅得攝氏一度的北京時卻笑容滿面，更首度開腔暢談感情事。記：記者 李：李嘉欣
記：係咪最近啲新聞令你唔開心？
李：又唔覺有乜新聞令我唔開心喎。
記：因為龐維仁講咗分手？
李：唔緊要，娛樂新聞，我一向冇特別講私事，𠵱家都唔會特別去講，我𠵱家係開心嘅，一個人，不過重感冒。
記：龐維仁話分手你哋事前有冇共識？
李：我哋冇聯絡，大家仍然係朋友。
自言有追求者
記：重有冇見面？
李：冇。
記：見到面會唔會打招呼？
李：呢個係我好特別嘅朋友，新聞冇影響過我哋，𠵱家重係朋友，唔會特別避忌。
記：龐維仁單身後會唔會再有發展機會？
李：每個人對所謂單身嘅定義都唔一樣，我認識佢時，佢係一個人住嘅，其他人覺得唔係啫。
記：佢有太太㗎喎。
李：我哋做朋友啫，你哋有咁嘅睇法唔緊要。
記：你𠵱家有冇人追？
李：我嘅感情生活好愉快，自己首先要好愛自己，先有好多人錫你，時代女性要對自己好好先有人愛護。
記：你感情方面開心，即係有拍拖？
李：拍拖定義係乜先？
記：拖手、咀咀同上床。
李（睜大眼哈哈大笑）：咁又冇喎，我單身一個人享受工作，有人約會就約會，𠵱家好愉快，追求者係有，做藝人拍拖係好難開心，因為太困難。
記：覺唔覺得唔好嘅新聞影響到你嘅形象？
李（突然提高聲線）：我認為市場冇影響，我覺得自己冇做過一樣嘢去傷害人哋。
記：覺唔覺得你嘅介入加速龐維仁同太太分手？
李：有好多嘢寫出嚟，要本人先知，我唔覺得係。
記：咁你做咗第三者係咪好無辜？
李：作為藝人，某啲影響要承受，冇辦法。
記：點解唔搞清楚啲關係先開始？
李：關乎𠵱家對現代愛情嘅睇法，事情寫得好複雜化，有好多大話。
記：你指邊方面？男方定女方講大話？
李：據我理解佢（龐維仁）冇講過一個大話。
記：你咁信佢？
李：朋友係應該信任。
記：將來會唔會check清楚先拍拖？
李（理直氣壯）：我心態係健康嘅，我冇做錯事，唔怕人點講。
黃美儀陪奶奶
此外，龐維仁母親盧淑燕及黃美儀昨日齊齊出席一沐浴用品店開幕禮。
對於嘉欣前晚在北京指有人講大話，龐老太說：「佢係artist，需要多啲智力，我理解嘅，nothingwrong，我係平凡人，我只係知道我會錫我個仔，而佢只係需要做仔要做嘅嘢。」
