無綫台慶將於下周六舉行，每年台慶頒發的女主角獎都會引起紛爭，去年勇奪該獎項的黎姿近日亦捲入郭可盈與汪明荃爭獎的是非中，昨日她就此事大呼救命，更懇求將她捲入是非的人放過她。
無綫台慶女主角獎項之爭帶出的是是非非，近日已進入白熱化階段，原先事件圍繞在兩大熱門郭可盈與汪明荃之間，但最近竟牽涉到黎姿身上，事緣日前就郭可盈與阿姐爭獎一事，黎姿說了一句：「佢（指郭可盈）想攞咪畀佢攞囉！」因而引發罵戰，郭可盈的經理人事後直指黎姿引起事端後又說謊，還暗指她去年靠續約換獎。
電話談心
「講到半夜兩點幾」
黎姿日前表示不欲捲入是非之中，已親向郭可盈解釋事件，但郭可盈前日則透過經理人表示從沒接過黎姿電話，言下之意似暗指黎姿講大話。
黎姿昨日接受本報記者訪問時，再次表明不希望就此事引發任何是非紛爭，更懇求「想搞事啲人」放她一馬，她一心只想做好自己的工作及拍好戲，目前只想全心全意籌辦自己的慈善基金會，沒有閒情去搬弄是非。
黎姿又澄清日前的確曾與郭可盈通電話解釋，她說：「我助手噚日（即前日）晏晝有同郭可盈通電話，解釋成件事，夜晚七、八點我都有親自同佢講電話，重通過幾次電話。
「我哋講到半夜兩點幾，講晒心事，相安無事，大家根本冇嘢，我亦唔想同事之間有任何交惡，唔明點解出嚟（新聞）會係咁，佢經理人會話我哋冇通過電話。」
搞清真相
「只想對得住良心」
因女主角獎而引發如此多是非，黎姿昨日一臉委屈地說：「今時今日我使唔使做呢啲嘢？求吓啲人放過我啦！真係救命呀！」黎姿一再重申不希望有任何是非發生在自己身上，就算最近《脂胭水粉》播出需要四出宣傳，也與一眾同事相處融洽。
問到黎姿所指的「某啲人」是誰？她說：「總之想搞事嗰啲人囉！唔該唔好搞我，放過我，救命呀！」問她日後與郭可盈見面會否感尷尬？黎姿說：「唔會尷尬，我只係想搞清楚件事，對得住良心，郭可盈係成熟嘅人，識分辨是非，佢唔會同我交惡，我哋講電話講心事到半夜，我亦希望日後繼續同佢做朋友。」
黎姿續說：「佢（指郭可盈）人又靚，着衫又靚，身材又好。」
否認換獎
「簽約係大勢所趨」
對於郭可盈的經理人暗指黎姿去年以合約換獎，黎姿說：「嚟緊重有十日就係台慶，年年都有是非，全部係舊聞，如果真係用合約去換獎，咁無綫有咁多藝人，咪要整多幾十個獎畀藝員？簽約TVB根本就係大勢所趨，大公司有佢嘅架構，好似《脂胭水粉》入面蒙嘉慧、陳敏之同向海嵐都簽咗約畀無綫，唔通又話向海嵐用合約換獎呀？」
另一方面，郭可盈昨日透過經理人回應說：「GiGi（黎姿）噚晚大約八點都打咗畀可盈，佢哋喺電話傾咗好耐，佢之後都唔會再回應呢件事。」
採訪、攝影：魯萍、比華利
