噚日有立法會議員批評銀行不斷刪減傳統分行，只着重設立財富管理中心，罔顧普羅大眾嘅需要。適逢渣打香港喺旺角嘅九龍旗艦店開幕，該行執行董事兼行政總裁蘇利民即時反駁，話渣打今年以來已喺九龍區開設咗4間新分行，以噚日正式開幕嘅旺角旗艦店為例，除咗優先理財、個人理財服務外，亦有櫃位、自助銀行等服務，一應俱全。
至於新界北區嘅銀行分行特別少，佢就話要視乎每區人口結構、人口規模同客戶需要，不時檢討分行數目。至今渣打嘅分店合共有70間，自動櫃員機就有89部。佢介紹旺角旗艦店有全港銀行界首創嘅服務，就係設有視像廳，有個好舒適嘅大廳畀銀行職員慢慢向客戶推介銀行嘅產品。而今年新開嘅尖沙嘴分店，亦設有全港獨家嘅尊貴保管箱中心私人房間服務，可以畀客戶慢慢在房內處理佢哋嘅金銀財寶。