鍾意同部車DIY嘅車主，車尾箱通常會有套簡單工具，以備不時之需，呢套鴨寮街買嘅六角螺絲工具就一定要有。我哋推介佢，第一係佢夠平，$98一套，英制同公制螺絲頭都有，共有39件配件，而且鋼水唔差，試咗三個月，未有蝕牙嘅情況，質素媲美$500嘅德國出品。等我哋講解吓有乜嘢用處先：
記者：伍旋卓
1.)14號：DIY換機油嘅車主，呢個好啱你。大部份日本車機油螺絲都係14號，有啲車就用11號。
2.)19號：有啲私家車胎芯和車軨螺絲都用19號頭，例如部份舊款五次元車軨，就係用19號頭。
3.)加長柄：引擎艙內好多位置都係伸手不到，加長柄就好有用。
4.)英制螺絲頭：由p到t，一共16個，英制同公制大細差少少，用得啱，就唔會扭到「滑牙」。
5.)紅色鐵盒：一個好靚嘅鐵盒，有個小型鎖扣，裏面嘅配件唔會四圍走。
6.)小手柄：中控台較窄嘅位置，可以用呢個小手柄。
7.)左右單向手把：手把有單向裝置，方便一些齒數較多的螺絲。
8.)拆車軨：啱大部份車軨螺絲，用呢個螺絲頭時，一定要用埋支加長柄，成個人企上去，壓一壓就開咗，由於佢比較細，唔會好似原裝十字批咁笨重。
9.)4-6號：車廂部件，例如表板、中控台和車門板，都會用上這些大小的螺絲頭。
10.)8-10號：部份歐洲車頭燈換膽時，都需要拆下燈杯，呢個螺絲頭就啱晒。
11.)11-13號：車廂內的座椅，全部都係六角頭，如果部車上咗年紀，座椅鬆咗，或要換座椅，呢幾個都係必用品。