SONY新推嘅BRAVIALCDTV系列，呢期喺AV場大熱賣；日本機！$14,800玩上32"（KLV-S32A10），價位完全貼住韓國仔，加埋SONY品牌效應，場內好多Sales都大歎「有客、有市、但唔夠貨」！
SONY嗰邊又點會將呢股氣勢停落嚟！最近佢哋又公布推出同BRAVIALCDTV襯到絕嘅RHT-G2000喇叭連AMP系統！SONY嘅S-Master數碼放大器，一直都帶住套裝式影音系統潮流，今次RHT-G2000更特別之處，就係加入了新研發的S-ForcePRO前置環迴立體聲技術，特別處係可以用2.1聲道，模擬出仿真度極高嘅5.1環迴立體聲效果；據稱這個S-Master配S-ForcePRO技術，是使用了全數碼音效處理系統，所以絕對係靚聲兼低失真！在SONY試玩會上，有一段直升機「環迴立體聲」測試，雖然只係有2.1聲道，但模擬感覺直情好似有部直升機喺正頭頂團團轉，再準確啲講係後置左、右聲道定位都好準確，不過後中置感覺音效就稍弱。
不過RHT-G2000更鬼馬之處，係成個喇叭加AMP系統，完全收藏於一個「電視枱」之內，兼同樓上嗰部BRAVIALCDTV機身顏色襯到絕，咁以後大家冇借口話玩靚聲效系統，又喇叭又線，會影響家居環境啦！試玩過嘅人都話音色幾正同幾炸得吓（700W），加上佢對應多組模擬、光纖及同軸等音效輸入，所以不論用嚟睇碟或睇電視都冇問題；據廠方表示，呢個「喇叭枱」暫時未有確切價錢及推出日期；但AV場內Sales表示，以BRAVIA嘅大件夾抵食原則，相信RHT-G2000定價應該唔會太高，而且行內盛傳近期勁缺貨嘅BRAVIA，聖誕檔期會有大貨返，所以趁住大節加推RHT-G2000作「聖誕禮物」，亦不足為奇，想買者，真係要昅實個市！
記者：朱崇德
同場加映
DAV-X1蚊型客廳影院組合
與RHT-G2000同期，重有一部DAV-X1嘅DVD影院組合公布，佢同樣係玩S-Master配S-ForcePRO技術，可以用2.1系統模擬出5.1聲道效果，總輸出有成300W，100零呎客廳用，音效絕對「不得了」！最令人心動者，是這套DVD影院組合唔使用後置喇叭，都可以模擬出環迴效果，對於香港好多「小家庭」，梳化椅「伸手開電視」，連後置喇叭都放唔落嘅蚊型客廳，係一個絕佳音效解決方案；DAV-X1同樣未有價錢及發售日期公布。
