港股噚日一個大翻身，恒指大升194點，收14597，成交亦大增到250億元，現時恒指已重上10日線（14470）同20日線（14475）之上，10月底的低位14189有機會係今次中期調整嘅浪底，恒指若升破上周五的高位14668，短線可向15000至15200區域推進，亦即會補回10月6日的大型下跌裂口（15138至14946）。
噚日升市有大成交配合，早輪被質到殘晒嗰幾隻大藍籌，噚日都一洗頹風；滙控（005）升1元、中移動（941）升1.10元、長實（001）升1.10元、和黃（013）更大升1.60元、新地（016）升0.75元。由於利率上升，地產股大圍個勢重係受壓，好似信置（083）同新世界（017）都只係升得0.10元，九倉（004）更原地踏步。喺噚日升市中，地產股未能跟上，美中不足。
呢輪太多人睇淡，噚日個市一轉勢，人人都要撲入個市追貨，特別係啲C輪，由開市搶到收市。噚日推介隻中石化（386），一度升上3.525元，收3.475元，升5仙，但中石化輪就升到突晒，以9292為例，最高搶到26仙，收25.5仙，大升29.4%。至於和黃、滙控同新地嘅C輪，唔少升幅都成30至40%。大市短期升勢若確認，窩輪又會炒到㷫烚烚。
中移動有好多大行睇好，噚日股價一舉重上10日、20日同50日線之上，且有2800多萬股嘅大成交支持，短期有機會重上10月初的高位38.55元。
內地電訊業正進行重組，加上預期內地3G或會延遲至06年下半年推出，中移動將會面對較小的市場競爭，對其有利。高盛證券最新研究報告就將中移動投資評級調高至「優於大市」，目標價亦由38元調高至40元。
炒C輪揀9306
里昂證券基於中移動客戶增長比預期佳，故調高其06年及07年嘅盈利預測，以及評級至「優於大市」，目標價為40元。BNP百富勤料中移動第4季上客可保持，維持其「買入」評級，目標價39.30元。
窩輪炒風又吹起，中移動既上望38至40元，佢嘅C輪中，9306夠晒活躍，短線有機會上番10月初嘅高位0.63元。
郭兆誠