細路豪開學後做咗行長班長，跟住做埋「健康大使」、「環保大使」，總之銜頭多多。星期日中午飲茶見到佢，於是問佢：「家香港搞緊政治改革，為委任、直選之爭，嘈餐懵，你知唔知乜嘢叫做委任、直選？」細路豪答：「你蝦小學生咩，我讀小五咋。」左丁山講：「呢課叫做公民教育，等你分清楚。嗱，你有咁多銜頭，係同學一人一票選你出嚟，還是班主任叫你做呀？」細路豪話：「我知。班主任叫我做班長嘅，其他嗰啲，先生話由同學投票選人喎。」左丁山話：「咁咪係囉，你做班長係委任制，老師點名要你做嘅。其他係普選制，同學選你做嘅。你話委任制好，還是普選制好？」
細路豪諗咗一諗：「班主任選班長，係要搵叻學生、肯做事嘅，我就係叻學生啦，先生揀得幾好吖。其他銜頭係冇乜人想做嘅，因為阻住讀書同埋玩嘅時間，所以我話想做，就有好多人投我一票。委任好，還是普選好呀？唔知喎！我知道有同學唔順我做班長，唔多合作，但知道個個都鍾意我做健康大使、環保大使，因為冇同學肯嘥時間去搞吖嘛！」
講落去，細路豪就明嘞，班主任唔想班長直選，因為驚住選咗一位又頑皮，又唔肯做事、掛住玩嘅學生出嚟，幫唔到佢手（例如收功課、派簿、入教員室聽命令），所以要自己控制任命，採取「精英制」，委任班上聽教聽話、功課唔曳嘅人做班長。至於其他課外生活閒職，應景啫，咪由學生自己選囉。
同細路豪講：「政府話遲早普選，但冇時間表；民主派話要有時間表，你認為點？」細路豪答：「先生唔委任我做班長，我就會要求班長實行普選制嘞！」既得利益，由細到大，深入人心。香港如果要推行全面民主，要由小學做起，班主任唔好委任班長，自細就叫學生一人一票選班長！