對音樂人來說，還以為音樂一定大過天，怎知面前兩位新進組合Bliss竟是例外。
古馳：「我哋好鍾意食，程度比音樂更甚，有時寫歌無靈感，我哋都會出去食嘢Relax吓。」
Oscar：「我哋都好鍾意食辣嘢，試過出Show前忍唔到口去食麻辣火鍋，結果表演時要咪嘴；又試過去台灣前忍唔住食麻辣杯麵，到機場肚痛去廁所，結果連班機都走埋！」
今次跟佢哋去三間心水舖，當中唔少係辣嘢，睇嚟要佢哋為音樂唔食辣？Noway啦！
記者：黃婉冰
攝影：楊錦文
勝利唔使𦧲骨嘅海南雞
以正宗泰式海南雞聞名，其海南雞飯最為人熟悉，去骨滑雞肉配上香噴噴油飯和自家調製的雞醬，啖啖雞肉鮮味嫩滑，還有其他小菜同樣落足料，份量夠大價錢平，難怪可以令兩位饞嘴鬼幫襯幾年。
茄汁大蝦$78
連殼食最誇張
古馳：我最鍾意連殼食，咁先食到原汁原味㗎嘛！
Oscar：佢啲蝦好肥大，甜同酸味調校得啱啱好。
海南雞飯$38（連例湯）$46（雞髀）
古馳：佢個雞醬最厲害，酸酸辣辣咁，好開胃。
Oscar：啲雞全部去晒骨，啖啖肉又夠滑，啱晒我啦！
勝利小廚（25669938）
地址：北角和富道124號地下
營業時間：上午11時至凌晨12時
容記視為第二飯堂
由於經常要蒲黃金商場買電腦音樂軟件，所以二人已視容記為他們的第二個飯堂。這裏只開晚市，每到食飯時段必定座無虛席。二人就是喜歡他的小炒夠鑊氣，而且上菜快。
揚名國際燒肉$80
記得點埋Wasabi
古馳：個皮好脆，蘸上日本芥辣，味道比傳統黃色芥辣濃好多，正！
Oscar：呢度啲燒肉有種入口即溶嘅感覺，個皮燒得好脆。
小炒皇$48
一定要加辣！
古馳：咁多間小炒舖我最鍾意呢間，夠鑊氣，每次都一定叫佢加辣，炸得香脆嘅蝦乾，送飯一流。
Oscar：佢個炸蝦乾同魷魚絲好香口惹味，XO醬辣辣哋，未食過啲蝦乾咁香脆。
容記小菜王（23871051）
地址：深水埗福華街118-120號地下桂林街交界
營業時間：下午5時半至凌晨2時
新德里 咖喱出晒名
這間位於重慶大廈3樓的新德里餐廳，環境最乾淨舒服。這裏的咖喱出名外，其拉茶和烤餅同樣別具風味，烤餅有多種不同選擇，拉茶即叫即沖，家庭式作業，勝在夠地道。
磨菠菜燴羊肉$52
香草辟羶
古馳：羊肉落咗香草去煮，辟走羶味，重有少少辣味，味道好特別。
Oscar：呢度啲羊肉一啲都唔覺羶，肉質好腍好入味，咖喱羊一樣咁好食。
瑪莎拉燴雞$46
「一定叫大辣」
古馳：咖喱香味好濃，煮得好滑，雞肉好入味。
Oscar：我鍾意佢個咖喱夠正宗，香得嚟又唔太辣，但我每次一定會叫大辣，食完可以用個汁送薯仔烤餅。
新德里餐廳（23681682）
地址：尖沙嘴彌敦道36-44號重慶大廈C座3樓
營業時間：下午12時半至3時半，下午6時至晚上11時半
